ആരാധകരെ അമ്പരപ്പിക്കുന്ന നൃത്തചുവടുമായി ഷെയ്ൻ നിഗം; ശ്രദ്ധനേടി ഗാനം, വീഡിയോ
ഷെയ്ൻ നിഗം നായകനായി എത്തുന്ന ഏറ്റവും പുതിയ ചിത്രം വലിയ പെരുനാളിലെ ഗാനം പുറത്തുവിട്ടു. താഴ്വാരങ്ങൾ എന്ന് തുടങ്ങുന്ന ഗാനത്തിന്റെ വീഡിയോയാണ് പുറത്തുവിട്ടത്. അൻവർ അലിയുടെ വരികൾക്ക് സംഗീതം പകർന്നിരിക്കുന്നത് റെക്സ് വിജയനാണ്. ആലാപനവും റെക്സ് വിജയനാണ്.
ഷെയ്ൻ നിഗത്തിന്റെ നൃത്തമാണ് ഗാനത്തിലെ മുഖ്യ ആകർഷണം. ചിത്രത്തിൽ ഷെയ്‌ന്റെ നായികയായി വേഷമിടുന്നത് ഹിമിക ബോസാണ്. അതേസമയം ചിത്രത്തിന്റേതായി നേരത്തെ പുറത്തിറങ്ങിയ ഗാനങ്ങളും ഏറെ ശ്രദ്ധ നേടിയിരുന്നു. നവാഗതനായ ഡിമൽ ഡെന്നീസാണ് ചിത്രം സംവിധാനം ചെയ്യുന്നത്. ‘ഫെസ്റ്റിവൽ ഓഫ് സാക്രിഫൈസ്’ എന്ന ടാഗ്‌ലൈനോടുകൂടിയാണ് ചിത്രം പുറത്തിറങ്ങുന്നത്.
Read also: ക്രിസ്മസ് അടിച്ചുപൊളിക്കാൻ സാന്റ എത്തുന്നു; തരംഗമായി ട്രെയ്‌ലർ
അൻവർ റഷീദ് അവതരിപ്പിക്കുന്ന ചിത്രം നിർമിക്കുന്നത് മാജിക് മൗണ്ടൻ സിനിമാസാണ്. ഷെയ്ൻ നിഗത്തിനൊപ്പം സൗബിൻ സാഹിർ, ജോജു എന്നിവരും ചിത്രത്തിൽ എത്തുന്നുണ്ട്. ഡിമലും തസ്ലിഖ് സലാമുമാണ് തിരക്കഥ ഒരുക്കിയിരിക്കുന്നത്.
അതേസമയം ‘ഇഷ്‌കാ’ണ് ഷെയ്ന്‍ നിഗത്തിന്റേതായി അവസാനമായി വെള്ളിത്തിരയിൽ എത്തിയ ചിത്രം. കഥാപാത്രത്തെ പൂർണമായും ഉൾക്കൊണ്ട് സിനിമയിൽ ജീവിക്കുന്ന യുവതാരങ്ങളിൽ ഒരാളാണ് ഷെയ്ൻ നിഗം. കുറഞ്ഞ ചിത്രത്തിലൂടെത്തന്നെ മികച്ച പ്രകടനം കാഴ്ചവച്ച് മലയാളികളുടെ പ്രിയപ്പെട്ട നായകനായി മാറിയ ഷെയ്ൻ, സച്ചിദാനന്ദൻ എന്ന ചെറുപ്പക്കാരനായി എത്തി, അവിശ്വസനീയമാം വിധം അഭിനയിച്ച ചിത്രമാണ് നവാഗതനായ അനുരാജ് മനോഹർ സംവിധാനം ചെയ്ത ഇഷ്‌ക്.
