ബാസ്കറ്റ്ബോൾ ഇതിഹാസം കോബി ബ്രയന്റിന് കായികലോകത്തിന്റെ ആദരാഞ്ജലി
ബാസ്കറ്റ്ബോൾ കോർട്ടിലെ ഇതിഹാസതാരം കോബി ബ്രയന്റ് ഹെലികോപ്റ്റർ അപകടത്തിൽ കൊല്ലപ്പെട്ടു. അമേരിക്കൻ ബാസ്ക്കറ്റ്ബോൾ ഇതിഹാസതാരം ഇന്നലെയാണ് കാലിഫോർണിയക്കടുത്ത കാലബാസാസിൽ വെച്ച് അപകടത്തിൽപെട്ടത്.
ഹെലികോപ്റ്റിന്റെ എൻജിൻ തകരാറിലായതിനെത്തുടർന്ന് ഉണ്ടായ അപകടത്തിലാണ് ബ്രയന്റ് കൊല്ലപ്പെട്ടത്. ബ്രയന്റിന്റെ മകൾ ഉൾപ്പെടെ ഒൻപത് പേരാണ് ഹെലികോപ്റ്ററിൽ ഉണ്ടായിരുന്നത്. മകളെ ബാസ്ക്കറ്റ്ബോൾ പരിശീലിപ്പിക്കാൻ പോകുംവഴിയാണ് അപകടം ഉണ്ടായതെന്നാണ് പ്രാഥമിക നിഗമനം.
അഞ്ചു തവണ ലോകചാമ്പ്യൻ, 18 തവണ ഓൾ സ്റ്റാർ, ഒളിമ്പിക്സിൽ രണ്ടു തവണ സ്വർണ്ണ മെഡൽ ജേതാവ്, മോസ്റ്റ് വാല്യുബ്ള്‍ പ്ലയർ എന്നീ നിലകളിലൊക്കെ തിളങ്ങിയ താരം മൈക്കിൾ ജോർഡന് ശേഷം കോർട്ടുകണ്ട ഏറ്റവും മികച്ച ഷൂട്ടിങ് ഗാർഡായിരുന്നു.
ഡൊണാൾഡ് ട്രംപ്, ക്രിസ്റ്റ്യാനോ റൊണാൾഡോ, ബെഞ്ചമിൻ നെതന്യാഹു, വീരാട് കോലി തുടങ്ങി നിരവധി ലോകനേതാക്കളും താരത്തിന്റെ മരണത്തിൽ അനുശോചനം രേഖപ്പെടുത്തി.
