ക്രിക്കറ്റ് ആരാധകർക്ക് ആവേശമായി രോഹിതിന്റെ കിടിലൻ ക്യാച്ച്; വൈറൽ വീഡിയോ
കളിക്കളത്തിലും ഗാലറിയിലും ഒരുപോലെ ആവേശത്തിരയിളക്കം സൃഷ്ടിക്കുന്ന ഒന്നാണ് ക്രിക്കറ്റ്. കളിക്കിടയിലെ ചില പ്രകടനങ്ങൾ മിക്കപ്പോഴും വാർത്തകളിൽ ഇടം നേടാറുണ്ട്. ഇപ്പോഴിതാ ഇന്ത്യ ന്യൂസിലാൻഡ് ടി- 20 മത്സരത്തിനിടയിലെ ആവേശകരമായ ഒരു ക്യാച്ചാണ് സമൂഹമാധ്യമങ്ങളിൽ വൈറലാകുന്നത്.
ക്രിക്കറ്റ് പ്രേമികൾ ആവേശത്തോടെ ഹിറ്റ്മാൻ എന്നു വിളിക്കുന്ന രോഹിത് ശർമ്മയാണ് ഈ കിടിലൻ ക്യാച്ചിന് പിന്നിൽ. ഇതോടെ ബാറ്റിങ്ങിൽ മാത്രമല്ല വിക്കറ്റിങ്ങിലും താൻ പുലിയാണെന്ന് തെളിച്ചിരിക്കുകയാണ് താരം.
അതേസമയം ഒരു ഓവർ ബാക്കിനിൽക്കെ ന്യൂസിലൻഡിനെ പരാജയപ്പെടുത്തി വിജയം നേടുകയായിരുന്നു ഇന്ത്യൻ ടീം. ടോസ് നേടിയ ഇന്ത്യ ബൗളിങ് തിരഞ്ഞെടുക്കുകയായിരുന്നു. ആദ്യം ബാറ്റിങ്ങിന് ഇറങ്ങിയ ന്യൂസിലാൻഡ് 203 റൺസ് നേടി. കൂറ്റന്‍ സ്‌കോര്‍ ലക്ഷ്യമാക്കി ബാറ്റു വീശിത്തുടങ്ങിയ ന്യൂസിലന്‍ഡിനെ അവസാന ഓവറുകളില്‍ ഇന്ത്യന്‍ ബൗളര്‍മാര്‍ വീഴ്ത്തി. അഞ്ച് വിക്കറ്റ് നഷ്ടത്തിലാണ് ന്യൂസിലന്‍ഡ് 203 റണ്‍സ് നേടിയത്.
ന്യൂസിലന്‍ഡിനെതിരെ ആദ്യം ബാറ്റിങ്ങിനിറങ്ങിയത് രോഹിത് ശര്‍മ്മയാണ്. ആറ് പന്തില്‍ നിന്നുമായി 7 റണ്‍സ് മാത്രം നേടിയാണ് രോഹിത് കളിക്കളം വിട്ടിറങ്ങിയത്. എന്നാൽ കെ എല്‍ രാഹുലിന്റെയും ശ്രേയസ് അയ്യറിന്റെയും അര്‍ധ സെഞ്ചുറി ഇന്ത്യയ്ക്ക് കരുത്തായി. ന്യൂസിലന്‍ഡ് ഉയര്‍ത്തിയ 204 റണ്‍സ് എന്ന വിജയലക്ഷ്യം 19 ഓവറില്‍ നാല് വിക്കറ്റ് നഷ്ടത്തില്‍ ഇന്ത്യ മറികടന്നു.
