കാലുകള്‍ തളര്‍ന്നിട്ടും ക്രിക്കറ്റിനെ സ്‌നേഹിച്ചു; റണ്‍സിനായി ഇഴഞ്ഞു നീങ്ങിയ കൊച്ചുമിടുക്കനെ തേടി ഒടുവില്‍ സച്ചിന് തെന്ഡുല്ക്കറിന്റെ സര്‍പ്രൈസ്
പുതുവര്‍ഷ ആരംഭത്തില്‍തന്നെ ക്രിക്കറ്റ് ഇതിഹാസം സച്ചിന് തെന്ഡുല്ക്കറിന്റെ ഒരു ട്വീറ്റ് ഏറെ ശ്രദ്ധ നേടിയിരുന്നു. ‘ഇവന്റെ കളി കണ്ട് 2020 തുടങ്ങൂ’ എന്ന അടിക്കുറിപ്പോടെയാണ് ഒരു കൊച്ചു ബാലന്റെ വീഡിയോ സച്ചിന് ട്വിറ്ററില്‍ പങ്കുവെച്ചത്. ബസ്തര്‍ മേഖലയിലെ റായ്പൂരുകാരന്‍ മഡ്ഡരാം ആയിരുന്നു വീഡിയോയിലെ താരം. കാലുകള്‍ തളര്‍ന്നിട്ടും ആവേശം ചോരാതെ കൂട്ടുകാര്‍ക്കൊപ്പം ക്രിക്കറ്റ് കളിക്കുന്ന കൊച്ചുമിടുക്കന്റെ വീഡിയോ അതിവേഗം സോഷ്യല്‍മീഡിയയില്‍ വൈറലായി.
പോളിയോ ബാധിച്ചാണ് ഈ പന്ത്രണ്ടുകാരന്റെ കാലുകള്‍ തളര്‍ന്നത്. എന്നാല്‍ ആ തളര്‍ച്ച ഈ മിടുക്കന്റെ ക്രിക്കറ്റിനോടുള്ള ഇഷ്ടത്തെ തെല്ലും തളര്‍ത്തിയില്ല. മുന്നിലേക്ക് പാഞ്ഞെത്തിയ പന്ത് അടിച്ച ശേഷം സിംഗിളിനായി ഇഴഞ്ഞ് നീങ്ങുന്ന മഡ്ഡരാം കാഴ്ചക്കാരുടെ കണ്ണു നിറച്ചു. എങ്കിലും ബാലന്റെ മനക്കരുത്തിന് നിറഞ്ഞ കൈയടി നല്‍കി സൈബര്‍ലോകം.
Read more: കുക്കീസ് സംവിധാനം നിര്‍ത്തലാക്കാന്‍ ഒരുങ്ങി ഗൂഗിള്‍ ക്രോം
ഇപ്പോഴിതാ ഒരു സര്‍പ്രൈസ് കൂടിയെത്തിയിരിക്കുകയാണ് മഡ്ഡരാമിനെ തേടി. അതും സാക്ഷാല്‍ ക്രിക്കറ്റ് ഇതിഹാസം സച്ചിന് തെന്ഡുല്ക്കറിന്റെ വക. ഒരു ക്രിക്കറ്റ് കിറ്റാണ് സച്ചിന് സമ്മാനമായി മഡ്ഡരാമിന്റെ മനക്കരുത്തിന് നല്‍കിയിരിക്കുന്നത്. ‘ആസ്വദിച്ചുള്ള ക്രിക്കറ്റ് കളി ഇഷ്ടപ്പെട്ടു. ആ ഇഷ്ടത്തിന് എന്റെ വക ഒരു ചെറിയ സമ്മാനം. കളി തുടരൂ..’ സമ്മാനത്തിനൊപ്പം ഇങ്ങനെ എഴുതിയ ഒരു കുറിപ്പും സച്ചിന് മഡ്ഡരാമിന് നല്‍കി.
സമൂഹ്യമാധ്യമങ്ങളിലൂടെ മഡ്ഡരാമിനെ കുറിച്ച് അറിഞ്ഞ് നിരവധി പേര്‍ ബാലന് സഹായവുമായെത്തുന്നുണ്ട്. ജില്ലാ വിദ്യാഭ്യസ വകുപ്പ് മുച്ചക്ര സൈക്കിളും ഈ മിടുക്കന് സമ്മാനിച്ചിരുന്നു.
