അന്നത്തെ 19 കാരന്റെ ആരാധനാപാത്രം ഇന്ന് അതേ താരത്തിന്റെ ആരാധകൻ…
ഇന്ത്യന്‍ നായകന്‍ വിരാട് കോലിയ്ക്ക് ആരാധകർ ഏറെയാണ്…ബാറ്റുമായി കോലി ക്രീസില്‍ ഇറങ്ങുമ്പോള്‍ മിക്കപ്പോഴും പുതു ചരിത്രങ്ങൾ പിറവിയെടുക്കും. ഇന്ത്യക്ക് പുറത്തും ആരാധകരുള്ള വീരാട് കോലി വർഷങ്ങൾക്ക് മുൻപ് തന്റെ ഇഷ്ടതാരത്തെ ആരാധകർക്കായി വെളിപ്പെടുത്തിയിരുന്നു. ദക്ഷിണാഫ്രിക്കൻ താരം ഹെർഷൽ ഗിബ്സ് ആയിരുന്നു കോലിയുടെ ഇഷ്ടതാരം.
2008 അണ്ടർ 19 ലോകകപ്പിൽ ഇന്ത്യ ചാമ്പ്യന്മാർ ആയപ്പോൾ അന്ന് ഇന്ത്യയെ നയിച്ചിരുന്നത് വിരാട് കോലി ആയിരുന്നു. അന്നത്തെ ലോകകപ്പ് മത്സരത്തിനിടെയാണ് കോലി തന്റെ ഇഷ്ടതാരത്തെ വെളിപ്പെടുത്തിയത്.
എന്നാൽ ഇന്ന് വർഷങ്ങൾക്കിപ്പുറം ലോകത്തിലെ തന്നെ ഏറ്റവും മികച്ച താരമായി കോലി വളർന്നുകഴിഞ്ഞപ്പോൾ കോലിയാണ് തന്റെ ഇഷ്ടതാരമെന്ന് വെളിപ്പെടുത്തിയിരിക്കുകയാണ് ഹെർഷൽ ഗിബ്സ്. അന്നത്തെ 19 കാരന്റെ ആരാധനാപാത്രം ഇന്ന് അതേ 19 കാരന്റെ ആരാധകനായി മാറിയിരിക്കുകയാണ്. ട്വിറ്ററിലെ ഒരു ആരാധകന്റെ ചോദ്യത്തിനുള്ള ഉത്തരമായാണ് ഗിബ്സ് തന്റെ ഇഷ്ടതാരത്തെ വെളിപ്പെടുത്തിയത്.
മലേഷ്യയിൽ വെച്ചു നടന്ന അണ്ടർ 19 ലോകകപ്പിലെ ഇന്ത്യയുടെ തിളക്കമാർന്ന വിജയത്തിനു പിന്നിൽ ടീം ക്യാപ്റ്റനായിരുന്ന കോലിയുടെ പങ്ക് വലുതായിരുന്നു.
