മായങ്ക് അഗര്‍വാളിനൊപ്പം ഓപ്പണ്‍ ചെയ്യാന്‍ ആരെത്തും; സജീവമാകുന്ന ക്രിക്കറ്റ് ചര്‍ച്ചകള്‍
ന്യൂസീലന്‍ഡിനെതിരെയുള്ള ടെസ്റ്റ് ക്രിക്കറ്റ് പരമ്പരയ്ക്കുള്ള ഒരുക്കത്തിലാണ് ഇന്ത്യന്‍ ക്രിക്കറ്റ് ടീം. കഴിഞ്ഞ ടി-20യില്‍ ഇന്ത്യ വിജയം കൊയ്തപ്പോള്‍ ഏകദിനത്തില്‍ ന്യൂസീലന്‍ഡാണ് വിജയിച്ചത്. അതുകൊണ്ടുതന്നെ ഇരു ടീമുകളും വിജയപ്രതീക്ഷയിലാണ് ടെസ്റ്റിന് ഒരുങ്ങുന്നതും.
ന്യൂസീലന്‍ഡിനെതിരെയുള്ള ടെസ്റ്റ് ക്രിക്കറ്റ് ടീമിനു വേണ്ടിയുള്ള ഇന്ത്യന്‍ ടീമിനെ പ്രഖ്യാപിച്ചതു മുതല്‍ ചില കായിക ചര്‍ച്ചകളും സജീവമായി. കെ എല്‍ രാഹുലിനെ ഓപ്പണറായി ഉള്‍പ്പെടുത്തുമെന്ന് ആരാധകര്‍ കരുതിയെങ്കിലും കെ എല്‍ രാഹുല്‍ ടീമില്‍ ഇടം നേടിയില്ല. മായങ്ക് അഗര്‍വാളിനൊപ്പം പൃഥ്വി ഷായെയാണ് സെലക്ടര്‍മാര്‍ പരിഗണിച്ചത്.
ശുഭ്മാന്‍ ഗില്ലും ടീമില്‍ ഇടംനേടി. അടുത്തകാലത്തായി ടെസ്റ്റ് ക്രിക്കറ്റില്‍ മായങ്ക് അഗര്‍വാള്‍ മികച്ച പ്രകടനമാണ് കാഴ്ചവയ്ക്കുന്നത്. അതുകൊണ്ടുതന്നെ ന്യൂസീലന്‍ഡിനെതിരെയുള്ള ടെസ്റ്റ് പരമ്പരയില്‍ ഓപ്പണര്‍മാരില്‍ ഒരാള്‍ മായങ്ക് അഗര്‍വാള്‍ ആകാനാണ് സാധ്യത.
അഗര്‍വാളിന്റെ കൂടെ ആരിറങ്ങും എന്ന കാര്യത്തിലാണ് ക്രിക്കറ്റ് ചര്‍ച്ചകള്‍ സജീവമാകുന്നത്. പൃഥ്വി ഷാ ഓപ്പണിങ്ങിന് ഇറങ്ങുമെന്ന് ചിലര്‍ വാദിക്കുമ്പോള്‍ ശുഭ്മാന്‍ ഗില്‍ ഓപ്പണിങ്ങിനിറങ്ങുമെന്നാണ് മറ്റു ചിലരുടെ അഭിപ്രായം. എന്നാല്‍ ന്യൂസീലന്‍ഡിനെതിരെ നടന്ന ത്രിദിന സന്നാഹമത്സരത്തില്‍ മികച്ച പ്രകടനം കാഴ്ചവയ്ക്കാന്‍ ഇരുവര്‍ക്കും സാധിച്ചിട്ടില്ല. ആദ്യ ഇന്നിങ്‌സ് അവസാനിച്ചപ്പോള്‍ സംപൂജ്യരായാണ് ഇരുവരും മടങ്ങിയത്.
