വെല്ലിംഗ്ടണില്‍ ഇന്ത്യയ്ക്ക് കനത്ത തോല്‍വി
ന്യൂസീലന്‍ഡിനെതിരെ വെല്ലിംഗ്ടണില്‍ വെച്ചുനടന്ന ആദ്യ ടെസ്റ്റില്‍ ഇന്ത്യയ്ക്ക് കനത്ത തോല്‍വി. പത്ത് വിക്കറ്റിന് ഇന്ത്യയെ പരാജയപ്പെടുത്തുകയായിരുന്നു ന്യൂസീലാന്‍ഡ്. രണ്ടാം ഇന്നിങ്സില്‍ വെറും എട്ട് റണ്‍സിന്‍റെ ലീഡ് മാത്രമാണ് കോലിപ്പടയ്ക്ക് ഉയര്‍ത്താനായത്. ന്യൂസിലന്‍ഡിന്‍റെ ഓപ്പണര്‍മാര്‍ രണ്ട് ഓവറിനുള്ളില്‍തന്നെ കളി പൂര്‍ത്തിയാക്കുകയും ചെയ്തു.
നാല് വിക്കറ്റ് നഷ്ടത്തില്‍ 144 റണ്‍സ് എന്ന നിലയില്‍ മത്സരം പുനഃരാരംഭിച്ച ഇന്ത്യ 191 റണ്‍സുമായി കളം വിട്ടു. 47 റണ്‍സ് അടിച്ചെടുക്കുന്നതിനിടെയില്‍ ഇന്ത്യയ്ക്ക് അവസാനത്തെ ആറ് വിക്കറ്റുകളും നഷ്ടമായി. ആദ്യ ടെസ്റ്റിന്‍റെ രണ്ട് ഇന്നിങ്സുകളിലുമായി 9 വിക്കറ്റുകള്‍ നേടിയ ന്യൂസീലന്‍ഡ് താരം ടിം സൗത്തിയാണ് മാന്‍ ഓഫ് ദ് മാച്ച്. ഈ മാസം 29 നാണ് രണ്ടാം ടെസ്റ്റ് ആരംഭിക്കുക.
ഇന്ത്യ- ന്യൂസീലന്‍ഡ് ടെസ്റ്റ് പരമ്പരയിലെ ആദ്യ ടെസ്റ്റിന്‍റെ ആദ്യ ഇന്നിങ്സില്‍ ഇന്ത്യ നേടിയത് 165 റണ്‍സാണ്. 68.1 ഓവറിലാണ് 165 റണ്‍സെടുത്ത് ഇന്ത്യന്‍ താരങ്ങള്‍ കളംവിട്ടത്. ന്യൂസീലന്‍ഡ് ആദ്യ ഇന്നിങ്സില്‍ 348 റണ്‍സ് അടിച്ചെടുത്ത ശേഷം ഓള്‍ഔട്ട് ആയി.
