ചിരി നിറച്ച് ‘പാപം ചെയ്യാത്തവര്‍ കല്ലെറിയട്ടെ’ ട്രെയ്‌ലര്‍
വിനയ് ഫോര്‍ട്ടും ടിനി ടോമും പ്രധാന കഥാപാത്രങ്ങളായെത്തുന്ന പുതിയ ചിത്രമാണ് ‘പാപം ചെയ്യാത്തവര്‍ കല്ലെറിയട്ടെ’. നര്‍മ്മപശ്ചാത്തലത്തിലാണ് ചിത്രം ഒരുങ്ങുന്നത്. സിനിമയുടെ ട്രെയ്‌ലര്‍ പുറത്തിറങ്ങി. ചിരിനിമിഷങ്ങള്‍ കോര്‍ത്തിണക്കിക്കൊണ്ടാണ് ട്രെയ്‌ലര്‍ ഒരുക്കിയിരിക്കുന്നതും. ശംഭു പുരുഷോത്തമന്‍ ആണ് ചിത്രത്തിന്റെ സംവിധായകന്‍.
‘വെടിവഴിപാട്’ എന്ന സിനിമയ്ക്ക് ശേഷം ശംഭു പുരുഷോത്തമന്‍ സംവിധാനം ചെയ്യുന്ന ചിത്രമാണ് ‘പാപം ചെയ്യാത്തവര്‍ കല്ലെറിയട്ടെ’ . ചിത്രത്തിന്റേതായി നേരത്തെ പുറത്തിറങ്ങിയ ടീസറും ചലച്ചിത്രലോകത്ത് ശ്രദ്ധിക്കപ്പെട്ടിരുന്നു. ഒരു മുഴുനീള കോമഡി ചിത്രമായിരിക്കും ‘പാപം ചെയ്യാത്തവര്‍ കല്ലെറിയട്ടെ’. ടീസറും ട്രെയ്‌ലറുമെല്ലാം ഇത് ശരിവയ്ക്കുന്നുണ്ട്.
ചിത്രത്തിന്റേതായി പുറത്തുവന്ന പോസ്റ്ററുകളും ഏറെ ശ്രദ്ധ നേടിയിരുന്നു. തലകുത്തി നില്‍ക്കുന്ന ടിനി ടോമിന്റെ കാരക്ടര്‍ പോസ്റ്റര്‍ നേരത്തെ ശ്രദ്ധിക്കപ്പെട്ടിരുന്നു. അലക്‌സ് എന്ന കഥാപാത്രമായാണ് ‘പാപം ചെയ്യാത്തവര്‍ കല്ലെറിയട്ടെ’ എന്ന ചിത്രത്തില്‍ ടിനി ടോം എത്തുന്നത്.
സ്‌പൈര്‍ പ്രൊഡക്ഷന്‍സിന്റെ ബാനറില്‍ സഞ്ജു എസ് ഉണ്ണിത്താന്‍ ആണ് ചിത്രത്തിന്റെ നിര്‍മാണം. ശ്രിന്ദ, അലന്‍സിയര്‍, അരുണ്‍ കുര്യന്‍, മധുപാല്‍ തുടങ്ങിയവരും ചിത്രത്തില്‍ പ്രധാന കഥാപാത്രങ്ങളായെത്തുന്നു.
