പ്രണവിനെ കാണാൻ മോഹൻലാൽ എത്തി; ഇഷ്ടതാരത്തിന് ഒടിയനെ വരച്ചുനൽകി കലാകാരൻ
ശാരീരിക വൈകല്യങ്ങൾക്കിടയിലും ഇച്ഛാശക്തികൊണ്ടും സാമൂഹ്യപ്രവർത്തനങ്ങളിലൂടെയും സോഷ്യൽ മീഡിയയുടെ ശ്രദ്ധ പിടിച്ചുപറ്റിയ കലാകാരനാണ് പ്രണവ്. കഴിഞ്ഞ പ്രളയകാലത്ത് മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന നൽകാൻ എത്തിയ പ്രണവ് കേരളക്കരയുടെ മുഴുവൻ ഇഷ്ടതാരമായി മാറിയിരുന്നു.
വാർത്തകളിലൂടെ മലയാളികളുടെ ഇഷ്ടതാരമായി മാറിയ കലാകാരനെ കാണാൻ എത്തിയ അതിഥിയാണ് ഇപ്പോൾ സോഷ്യൽ മീഡിയയുടെ മനം കവരുന്നത്. മെഗാസ്റ്റാർ മോഹൻലാലാണ് പ്രണവിനെ കാണാൻ എത്തിയത്. ജന്മനാ ഇരുകൈകളും ഇല്ലാത്ത പ്രണവ് നല്ലൊരു ചിത്രകാരനാണ്.
തന്നെ കാണാൻ എത്തിയ അതിഥിക്ക് നൽകാൻ ഒരു മനോഹര സമ്മാനവും പ്രണവ് കരുതിയിരുന്നു. ചെറുപ്പം മുതലേ മോഹൻലാലിന്റെ കടുത്ത ആരാധകനാണ് പ്രണവ്. പ്രണവ് വരച്ച മോഹൻലാലിൻറെ ചിത്രമാണ് തന്റെ ഇഷ്ടതാരത്തിനായി കരുതിവച്ചത്. ‘ഒടിയൻ’ എന്ന ചിത്രത്തിലെ മാണിക്യന്റെ രൂപമാണ് പ്രണവ് വരച്ചത്.
ഇഷ്ടതാരത്തിനൊപ്പം ചിത്രങ്ങൾ എടുത്തതിനും, വിശേഷങ്ങൾ പങ്കുവെച്ചതിനും ശേഷമാണ് ഇരുവരും പിരിഞ്ഞത്.
