പ്രണയ നോട്ടങ്ങളുമായി ‘മഹേഷിന്റെ പ്രതികാരം’ തെലുങ്കിലേക്ക്; ശ്രദ്ധേയമായി ടീസര്‍
ഒരു നോട്ടം കൊണ്ടുപോലും വെള്ളിത്തിരയില്‍ അത്ഭുതങ്ങള്‍ തീര്‍ക്കുന്ന ഫഹദ് ഫാസില്‍ കേന്ദ്ര കഥാപാത്രമായെത്തിയ ‘മഹേഷിന്റെ പ്രതികാരം’ എന്ന ചിത്രം തെലുങ്ക് റിമേക്കിനൊരുങ്ങുന്നു. തെലുങ്ക് പതിപ്പിന്റെ ടീസര്‍ പുറത്തിറങ്ങി. ‘ഉമാ മഹേശ്വരാ ഉഗ്ര രൂപസ്യ’ എന്നാണ് തെലുങ്ക് പതിപ്പിന്റെ പേര്. സത്യ ദേവ് ആണ് ചിത്രത്തില്‍ നായ കകഥാപാത്രമായെത്തുന്നത്.
‘ഉമാ മഹേശ്വരാ ഉഗ്ര രൂപസ്യ’ എന്ന ചിത്രത്തിന്റെ സംവിധാനം നിര്‍വഹിക്കുന്നത് വെങ്കിടേഷ് മഹ ആണ്. സുഹാസ്, ജബ്ബര്‍ദസ്ത് റാംപ്രസാദ്, ടിഎന്‍ആര്‍, രവീന്ദ്ര വിജയ്, കെ രാഘവന്‍ എന്നിവരും ചിത്രത്തില്‍ പ്രധാന കഥാപാത്രങ്ങളായെത്തുന്നു. ബ്രഹ്മാണ്ഡ ചിത്രം ബാഹുബലി നിര്‍മിച്ച ആര്‍ കെ മീഡിയ വര്‍ക്‌സ് ആണ് ചിത്രത്തിന്റെ നിര്‍മാണം. അപ്പു പ്രഭാകര്‍ ആണ് ചിത്രത്തിന്റെ ഛായാഗ്രാഹകന്‍, ബിജിബാല്‍ സംഗീതം പകര്‍ന്നിരിക്കുന്നു. ഏപ്രില്‍ 17 മുതല്‍ ചിത്രം തിയേറ്ററുകളില്‍ പ്രദര്‍ശനത്തിനെത്തും.
ദിലീഷ് പോത്തന്റെ സംവിധാനത്തില്‍ ഒരുങ്ങിയ ‘മഹേഷിന്റെ പ്രതികാരം’ എന്ന ചിത്രത്തിന് മികച്ച പ്രേക്ഷക സ്വീകാര്യതയാണ് ലഭിച്ചത്. ഫഹദ് ഫാസിലിനൊപ്പം സൗബിന്‍ ഷാഹിര്‍, അലന്‍സിയര്‍, കെ എല്‍ ആന്റണി, അനുശ്രീ, അപര്‍ണ ബാലമുരളി എന്നിവരും ചിത്രത്തില്‍ പ്രാധാന കഥാപാത്രങ്ങളെ അവതരിപ്പിച്ചു. 2016-ലെ മികച്ച ജനപ്രിയ ചിത്രത്തിനുള്ള കേരള സര്‍ക്കാര്‍ പുരസ്‌കാരവും ‘മഹേഷിന്റെ പ്രതികാരം’ എന്ന ചിത്രമാണ് നേടിയത്.
