ആക്ഷൻ ഹീറോ ബിജു രണ്ടാം ഭാഗം വരുന്നു
‘ചുമ്മാതെ ആണെങ്കിലും ഇങ്ങനെ ഒന്നും പറയരുത് സാറെ…’ സൂരാജ് വെഞ്ഞാറന്മൂട് എന്ന നടന്റെ അഭിനയത്തിന്റെ പുതിയ തലങ്ങൾ കണ്ടെത്തിയ ഡയലോഡ്. മേരി ചേച്ചിയെയും ബേബി ചേച്ചിയെയും, അരിസ്റ്റോ സുരേഷിനെയും മലയാളികൾക്ക് പരിചയപ്പെടുത്തിയ ചിത്രം. കേരളത്തിലെ ഒരു ശരാശരി പൊലീസ് സ്റ്റേഷനെ ഒട്ടും അതിശയോക്തി കൂടാതെ അവതരിപ്പിച്ച ചിത്രം…പറഞ്ഞുവരുന്നത് തിയേറ്ററുകളിൽ മികച്ച സ്വീകാര്യത നേടിയ ‘ആക്ഷൻ ഹീറോ ബിജു’ എന്ന ചിത്രത്തെക്കുറിച്ചാണ്.
നിവിൻ പോളി പ്രധാന കഥാപാത്രമായി എത്തിയ ചിത്രം സംവിധാനം ചെയ്തത് എബ്രിഡ് ഷൈൻ ആണ്. ഇപ്പോഴിതാ ചിത്രത്തിന്റെ രണ്ടാം ഭാഗം ഒരുങ്ങുകയാണ്. നിവിൻ പോളി തന്നെയായിരിക്കും രണ്ടാം ഭാഗത്തിലും മുഖ്യ കഥാപാത്രത്തെ അവതരിപ്പിക്കുന്നത്.
അതേസമയം രാജീവ് രവി സംവിധാനം ചെയ്യുന്ന തുറമുഖം, സണ്ണി വെയ്ൻ നിര്‍മ്മിക്കുന്ന പടവെട്ട് എന്നീ ചിത്രങ്ങളും നിവിൻ പോളിയുടേതായി വെള്ളിത്തിരയിൽ ഒരുങ്ങുന്നുണ്ട്. നിവിൻ പോളിയുടേതായി അവസാനം വെള്ളിത്തിരയിൽ എത്തിയ ചിത്രം മൂത്തോൻ ആണ്. ഗീതു മോഹൻദാസ് സംവിധാനം നിർവഹിച്ച ചിത്രത്തിന് ഏറെ പ്രേക്ഷക പ്രശംസ ലഭിച്ചിരുന്നു. ചിത്രത്തിലെ താരത്തിന്റെ അഭിനയവും ഏറെ അഭിനന്ദനം ഏറ്റുവാങ്ങുന്നതായിരുന്നു.
‘1983’, ‘ആക്ഷൻ ഹീറോ ബിജു’, ‘പൂമരം’ തുടങ്ങിയ ചിത്രങ്ങളിലൂടെ മലയാളികളുടെ പ്രിയ സംവിധായകനായി മാറിയ എബ്രിഡ് ഷൈന്റേതായി അവസാനം വെള്ളിത്തിരയിൽ എത്തിയ ചിത്രം ‘ദി കുങ്ഫു മാസ്റ്റർ’ ആണ്. പേര് സൂചിപ്പിക്കുന്നത് പോലെതന്നെ കുങ്ഫു എന്ന ആയോധന കല പ്രമേയമാക്കി ഒരുങ്ങിയ ആക്ഷൻ ചിത്രമാണിത്. സിനിമയിൽ മുഖ്യ കഥാപാത്രമായി എത്തിയത് നീത പിള്ളയാണ്. മികച്ച സ്വീകാര്യതയാണ് ചിത്രത്തിനും ലഭിച്ചത്.
