നാളെ രാത്രി മുതല്‍ ആഭ്യന്തര വിമാന സര്‍വീസുകള്‍ നിര്‍ത്തും; നിയന്ത്രണങ്ങൾ ശക്തം
കൊവിഡ്-19 ഭീതിയിൽ വാലേ നിർണായകമായ ദിനങ്ങളിലൂടെയാണ് രാജ്യം കടന്നു പോകുന്നത്. പൊതുഗതാഗതങ്ങളൊക്കെ സ്തംഭിച്ചതിന് തുല്യമാണ്. ട്രെയിൻ സർവീസുകളും ഞായറാഴ്ച പൂർണമായും നിർത്തലാക്കി. അന്താരാഷ്ട്ര വിമാന സർവീസ് നിർത്തലാക്കിയതിനു പിന്നാലെ ആഭ്യന്തര വിമാന സർവീസും നിർത്തലാക്കുകയാണ്.
നാളെ അര്‍ധരാത്രി മുതല്‍ ആഭ്യന്തര വിമാന സര്‍വീസുകള്‍ നിര്‍ത്തിവെയ്ക്കും. കാര്‍ഗോ വിമാന സര്‍വീസിന് ഇത് ബാധകമല്ല. കൊറോണ വൈറസ് വ്യാപനം തടയുന്നതിന്റെ ഭാഗമായാണ് ആഭ്യന്തര വിമാന സര്‍വീസുകളും നിര്‍ത്തിയത്. എത്രനാളത്തേയ്ക്കാണ് സര്‍വീസ് നിര്‍ത്തിവെയ്ക്കാന്‍ പോകുന്നത് എന്നത് വ്യക്തമല്ല.
അതേസമയം കേരളത്തിൽ പൂർണമായും ലോക്ക് ഡൗൺ പ്രഖ്യാപിച്ചിരിക്കുകയാണ്. കടുത്ത നിയന്ത്രണങ്ങൾ ആവശ്യമായ ഘട്ടത്തിലേക്ക് സംസ്ഥാനം കടക്കുകയാണ്. ഇന്ന് മാത്രം കേരളത്തിൽ നിന്നും സ്ഥിരീകരിച്ചത് 28 കൊവിഡ്-19 കേസുകളാണ്.
നിലവിൽ കാസർകോട് ജില്ലയിലാണ് ഏറ്റവുമധികം രോഗബാധിതർ. നിരോധനാജ്ഞ കാസർകോടും കോഴിക്കോടും നേരത്തെ തന്നെ പ്രഖ്യാപിച്ചിരുന്നു.
