ഐസിസി റാങ്കിങ്ങില്‍ ഷഫാലി വര്‍മ ഒന്നാമത്
ഐസിസി വനിതാ ടി-20 ക്രിക്കറ്റ് ലോകകപ്പില്‍ തകര്‍പ്പന്‍ പ്രകടനത്തിലൂടെ കൈയടി നേടുകയാണ് ഷഫാലി വര്‍മ. ഐസിസിയുടെ റാങ്കിങ്ങിലും ഒന്നാമതെത്തിയിരിക്കുകയാണ് താരം. ഐസിസി പുറത്തുവിട്ട പട്ടികയില്‍ 761 പോയിന്റുകളോടെയാണ് ഷഫാലി വര്‍മ ഒന്നാമതെത്തിയത്.
ന്യൂസീലന്‍ഡ് താരം സൂസി ബെയ്റ്റ്‌സാണ് റാങ്കിങ്ങില്‍ രണ്ടാമത്. ടി-20 ലോകകപ്പിലെ മികവാര്‍ന്ന പ്രകടനമാണ് ഷഫാലി വര്‍മ എന്ന പതിനാറുകാരിയെ തുണച്ചത്. നാല് മത്സരങ്ങളിലായി താരം 161 റണ്‍സ് നേടി. ട്വന്റി-20 ബാറ്റിങ് റാങ്കിങ്ങില്‍ ഒന്നാം സ്ഥാനത്തെത്തുന്ന രണ്ടാമത്തെ ഇന്ത്യക്കാരിയാണ് ഷഫാലി. മുന്‍പ് മിതാലി രാജ് ഒന്നാം സ്ഥാനത്ത് എത്തിയിട്ടുണ്ട്.
ബൗളര്‍മാരുടെ റാങ്കിങ്ങില്‍ ഇംഗ്ലണ്ട് താരം സോഫി എക്ലസ്റ്റോണാണ് ഒന്നാം സ്ഥാനത്ത്. ഇന്ത്യയുടെ ദീപ്തി ശര്‍മ അഞ്ചാം സ്ഥാനത്തും രാധാ യാദവ് ഏഴാം സ്ഥാനത്തും പൂനം യാദവ് എട്ടാം സ്ഥാനത്തുമുണ്ട്.
