അമ്മൂമ്മയുടെ തകര്‍പ്പന്‍ ബൗളിങ്ങില്‍ അപ്പൂപ്പന്റെ ബാറ്റിങ്: പ്രായത്തെ വെല്ലുന്ന ക്രിക്കറ്റ് കളി വൈറല്‍
കാഴ്ചക്കാരെ ആവേശത്തിലാക്കുന്ന കായിക ഇനമാണ് ക്രിക്കറ്റ് കളി. ഗ്രൗണ്ടില്‍ ബാറ്റിങ്ങിലും ബൗളിങ്ങിലും കായികതാരങ്ങള്‍ കലക്കന്‍ പ്രകടനങ്ങള്‍ കാഴ്ചവയക്കുമ്പോള്‍ ഗാലറിയിലിരുന്ന് ആര്‍പ്പുവിളിക്കാറുണ്ട് കാണികള്‍. ഇപ്പോഴിതാ സമൂഹമാധ്യമങ്ങളില്‍ ശ്രദ്ധ നേടുന്നതും ഒരു ക്രിക്കറ്റ് മാച്ചാണ്.
അപ്പൂപ്പനും അമ്മൂമ്മയും തമ്മിലുള്ള ക്രിക്കറ്റ് കളിയാണ് സൈബര്‍ലോകത്ത് നിറയുന്നത്. പ്രായത്തെ വെല്ലുന്ന ഇവരുടെ പ്രകടനത്തിന് നിറഞ്ഞ് കൈയടിക്കുകയാണ് സോഷ്യല്‍മീഡിയ. അമ്മൂമ്മയാണ് ബൗളിങ്. അപ്പൂപ്പന്‍ ബാറ്റിങ്. ആക്ഷനോടുകൂടിയുള്ള അമ്മൂമ്മയുടെ ബൗളിങ്ങും അപ്പൂപ്പന്റെ ബാറ്റിങ്ങും ഒന്നിനൊന്ന് മികച്ചുനില്‍ക്കുന്നു.
‘ലോകകപ്പ് ക്രിക്കറ്റ് മാച്ചില്‍ ഇന്ത്യാ- പാകിസ്ഥാന്‍ ഫൈനല്‍ മാച്ചു പോലും ഇത്രയേറെ ആസ്വദിച്ചിട്ടില്ല’ എന്ന അടിക്കുറിപ്പോടെ പ്രചരിക്കുന്ന ഈ ക്രിക്കറ്റ് വീഡിയോ ഇതിനോടകംതന്നെ നിരവധിപ്പേരാണ് സമൂഹമാധ്യമങ്ങളില്‍ പങ്കുവെച്ചിരിക്കുന്നത്. പ്രായം മറന്ന് ക്രിക്കറ്റിനെ ഏറ്റെടുത്ത അപ്പൂപ്പനും അമ്മൂമ്മയ്ക്കും അഭിനന്ദനം അറിയിക്കുന്നവരും നിരവധിയാണ്.
