വീണ്ടുമൊരു ഫഹദ് മാജിക്; ‘സി യു സൂണ്‍’ ട്രെയ്‌ലര്‍ ശ്രദ്ധേയമാകുന്നു
ഒരു നോട്ടംകൊണ്ടുപോലും വെള്ളിത്തിരയില്‍ വിസ്മയങ്ങള്‍ ഒരുക്കുന്ന താരമാണ് ഫഹദ് ഫാസില്‍. അവതരിപ്പിക്കുന്ന ഓരോ കഥാപാത്രങ്ങളെയും പരിപൂര്‍ണ്ണതയിലെത്തിച്ച് താരം പ്രേക്ഷകരെ അതിശയിപ്പിക്കുന്നു. ഫഹദ് ഫാസില്‍ കേന്ദ്ര കഥാപാത്രമായെത്തുന്ന പുതിയ ചിത്രമാണ് സി യു സൂണ്‍. ചിത്രത്തിന്റെ ട്രെയ്‌ലര്‍ പുറത്തിറങ്ങി.
മഹേഷ് നാരായണന്‍ ആണ് ചിത്രത്തിന്റെ സംവിധാനം നിര്‍വഹിക്കുന്നത്. ചിത്രത്തില്‍ ഫഹദിനൊപ്പം റോഷന്‍ മാത്യുവും ദര്‍ശന രാജേന്ദ്രനും കേന്ദ്ര കഥാപാത്രങ്ങളായി എത്തുന്നുണ്ട്. ആമസോണ്‍ പ്രൈമിലൂടെയാണ് ചിത്രം റിലീസിനെത്തുക. അതേസമയം 90 മിനിറ്റ് മാത്രം ദൈര്‍ഘ്യമുള്ള ചിത്രമാണ് സി യു സൂണ്‍. പൂര്‍ണ്ണമായും മൊബൈലിലാണ് ഈ സിനിമ ഷൂട്ട് ചെയ്തിരിക്കുന്നത് എന്നതും മറ്റൊരു പ്രത്യേകതയാണ്.
കൊവിഡ് പശ്ചാതലത്തില്‍ തിയേറ്റര്‍ റിലീസുകള്‍ സാധ്യമല്ലാത്ത സാഹചര്യമാണ് നിലവിലുള്ളത്. ഫഹദ് ഫാസിലിന്റെ ചിത്രവും ഒടിടി പ്ലാറ്റ്‌ഫോമിലൂടെ പ്രേക്ഷകരിലേക്കെത്തുമ്പോള്‍ പ്രതീക്ഷയിലാണ് പ്രേക്ഷകരും. ജയസൂര്യ കേന്ദ്ര കഥാപാത്രമായെത്തിയ സൂഫിയും സുജാതയും ആയിരുന്നു മലയാളത്തില്‍ ആദ്യമായി ഡയറക്ട് ഒടിടി റിലീസ് ചെയ്ത ചിത്രം.
Story highlights: C U Soon Official Trailer Fahadh Faasil, Roshan Mathew, Darshana Rajendran
