ഇച്ചാക്കയ്ക്ക് ഒരു സ്നേഹ ചുംബനം; പിറന്നാൾ ആശംസകൾക്കൊപ്പം പഴയകാല ചിത്രം പങ്കുവെച്ച് മോഹൻലാൽ
മലയാള സിനിമയിലെ മെഗാസ്റ്റാറുകളാണ് മമ്മൂട്ടിയും മോഹൻലാലും. വെള്ളിത്തിരയ്ക്ക് അപ്പുറവും ഇരുവരുടെയും സ്നേഹവും സൗഹൃദം സജീവമാണ്. ഇപ്പോഴിതാ മലയാളത്തിന്റെ മെഗാസ്റ്റാർ മമ്മൂട്ടിയുടെ പിറന്നാൾ ദിനത്തിൽ മോഹൻലാൽ പങ്കുവെച്ച ചിത്രമാണ് സിനിമ പ്രേമികൾക്കിടയിൽ ശ്രദ്ധിക്കപ്പെടുന്നത്. ഇരുവരും ഒന്നിച്ച ‘നമ്പർ 20 മദ്രാസ് മെയിൽ’ എന്ന സിനിമയിലെ ഒരു ചിത്രമാണ് മോഹൻലാൽ സമൂഹ മാധ്യമത്തിൽ പങ്കുവെച്ചിരിക്കുന്നത്.
‘പ്രിയപ്പെട്ട ഇച്ചാക്ക, നല്ലൊരു പിറന്നാൾ ദിനം നേരുന്നു, എന്നും സ്നേഹം മാത്രം. ദൈവം അനുഗ്രഹിക്കട്ടെ.’…എന്ന അടിക്കുറുപ്പോടെയാണ് മോഹൻലാൽ ചിത്രം സോഷ്യൽ മീഡിയയിൽ പങ്കുവെച്ചിരിക്കുന്നത്. മോഹൻലാൽ പങ്കുവെച്ച ചിത്രം ഇതിനോടകം ആയിരക്കണക്കിന് ആരാധകരാണ് ഏറ്റെടുത്തത്. അതേസമയം നേരത്തെ മോഹൻലാലിൻറെ പിറന്നാൾ ദിനത്തിൽ മമ്മൂട്ടി പങ്കുവെച്ച വീഡിയോയും സോഷ്യൽ മീഡിയയിൽ വൈറലായിരുന്നു. മോഹൻലാൽ എനിക്ക് സഹോദതുല്യനാണ് എന്നായിരുന്നു മമ്മൂട്ടി വീഡിയോ പങ്കുവെച്ചുകൊണ്ട് കുറിച്ചത്.
Read also: മമ്മൂക്കയ്ക്ക് പിറന്നാൾ മധുരമൊരുക്കി താരങ്ങളും ആരാധകരും; ശ്രദ്ധനേടി വീഡിയോ
അതേസമയം അറുപത്തിയൊന്‍പതിന്റെ നിറവില്‍ നില്‍ക്കുന്ന മമ്മൂട്ടിക്ക് വ്യത്യസ്തമായ പിറന്നാള്‍ സമ്മാനങ്ങളും ആശംസകളുമായി നിരവധിപ്പേരാണ് എത്തുന്നത്. നേരത്തെ മമ്മൂട്ടിയ്ക്ക് പിറന്നാൾ സമ്മാനമായി സിനിമ താരങ്ങൾ ഒരുക്കിയ വീഡിയോ ഗാനവും ഏറെ ശ്രദ്ധിക്കപ്പെട്ടിരുന്നു. മമ്മൂട്ടിയുടെ ചിത്രങ്ങളിലെ വ്യത്യസ്ത ദൃശ്യങ്ങൾ കോർത്തിണക്കിയാണ് വീഡിയോ തയാറാക്കിയിരിക്കുന്നത്. നാദിർഷ, അജയ് വാസുദേവ്, രമേഷ് പിഷാരടി, ബാദുഷ, ഡിക്സൺ എന്നിവർ ചേർന്നാണ് മനോഹരമായ വീഡിയോ ഗാനം ഒരുക്കിയത്. മമ്മുക്കയുടെ ജന്മദിനത്തിൽ ലോകം മുഴുവനുമുള്ള മമ്മൂട്ടി ആരാധകർക്കായി സമർപ്പിക്കുന്നു എന്ന് പറഞ്ഞുകൊണ്ടാണ് ഗാനം ആരംഭിക്കുന്നത്.
Story Highlights:Mohanlal birthday wishes to Mammootty
