ടോം ക്രൂയിസിന്‍റെ ആക്ഷന്‍ രംഗത്തില്‍ അതിശയിച്ച് സമൂഹമാധ്യങ്ങള്‍- ചിത്രീകരണ വീഡിയോ
സിനിമ എന്നത് ഓരോ കാഴ്ചക്കാരനും വ്യത്യസ്തമായ അനുഭവങ്ങളാണ് സമ്മാനിക്കുന്നത്. സ്‌ക്രീനില്‍ കാണുമ്പോള്‍ പ്രേക്ഷകര്‍ സ്വയം മറന്ന് ആവേശം കൊള്ളുന്ന പല ആക്ഷന്‍ രംഗങ്ങള്‍ക്ക് പിന്നിലും ഒരുപാട് പ്രയത്‌നങ്ങളും കഷ്ടപ്പാടുകളുമൊക്കെ ഉണ്ടാകാറുണ്ട്. ഇപ്പോഴിതാ ശ്രദ്ധ നേടുകയാണ് അതിശയിപ്പിക്കുന്ന ഒരു ആക്ഷന്‍ രംഗത്തിന്റെ ചിത്രീകരണ വീഡിയോ.
ടോം ക്രൂയിസ് കേന്ദ്ര കഥാപാത്രമായെത്തുന്ന മിഷന്‍ ഇംപോസിബിള്‍ 7 എന്ന ചിത്രത്തില്‍ നിന്നുള്ളതാണ് ഈ ആക്ഷന്‍ രംഗം. കൂറ്റന്‍ സെറ്റില്‍ നിന്നുള്ള ബൈക്ക് സ്റ്റണ്ടാണ് വീഡിയോയില്‍ കാണാന്‍ സാധിക്കുക. ഇതിനോടകം തന്നെ വീഡിയോ സമൂഹമാധ്യമങ്ങളിലും ശ്രദ്ധ നേടിക്കഴിഞ്ഞു. ടോം ക്രൂയിസിനെ അഭിനന്ദിച്ച് രംഗത്തെത്തുന്നവരും നിരവധിയാണ്.
കൊവിഡ് പ്രതിസന്ധിമൂലം അല്‍പകാലത്തേക്ക് മിഷന്‍ ഇംപോസിബിള്‍ 7 ന്റെ ചിത്രീകരണത്തിന് തടസം നേരിടേണ്ടി വന്നിരുന്നു. എന്നാല്‍ ജൂലൈയോടെ ചിത്രീകരണം പുനഃരാരംഭിച്ചു. ഇതിനിടെയാണ് ഓക്‌സഫോര്‍ഡ്ഷയറില്‍ കോടിക്കണക്കിന് രൂപ മുടക്കി നിര്‍മിച്ച സെറ്റ് കത്തി നശിച്ചത്.
ചിത്രത്തിന്റെ സഹനിര്‍മാതാക്കളില്‍ ഒരാളുകൂടിയാണ് ടോം ക്രൂയിസ്. ക്രിസ്റ്റഫര്‍ മക്വാറി ആണ് ചിത്രത്തിന്റെ സംവിധാനം നിര്‍വഹിക്കുന്നത്. മിഷന്‍ ഇംപോസിബിള്‍ റോഗ് നേഷന്‍, മിഷന്‍ ഇംപോസിബിള്‍ ഫാളൗട്ട് എന്നീ ചിത്രങ്ങള്‍ക്ക് ശേഷം ക്രിസ്റ്റഫര്‍ മക്വാറി സംവിധാനം നിര്‍വഹിക്കുന്ന ചിത്രമാണ് മിഷന്‍ ഇംപോസിബിള്‍ 7. ദിവസങ്ങള്‍ക്ക് മുമ്പ് പുറത്തിറങ്ങിയതാണ് ചിത്രീകരണ വീഡിയോ. എങ്കിലും ഇപ്പോഴും സമൂഹമാധ്യമങ്ങളില്‍ പ്രചരിക്കപ്പെടുന്നുണ്ട് ഈ അതിസാഹസികത നിറഞ്ഞ രംഗങ്ങള്‍.
Story highlights: Tom Cruise Mission Impossible Viral Video
