നായകനായി തിളങ്ങാൻ കാളിദാസ് ജയറാം; പുതിയ ചിത്രമൊരുങ്ങുന്നു
ബാലതാരമായി വന്ന് സിനിമ ആസ്വാദകരുടെ ഹൃദയത്തിൽ ഇടംനേടിയതാണ് കാളിദാസ് ജയറാം. ബാലതാരത്തിൽ നിന്നും നായകനായി കാളിദാസ് എത്തിയപ്പോളും പ്രേക്ഷകർ നെഞ്ചിലേറ്റിയ കാളിദാസിന്റെ ഏറ്റവും പുതിയ ചിത്രം ഒരുങ്ങുന്നു. വിനിൽ വർഗീസ് തിരക്കഥ എഴുതി സംവിധാനം നിർവഹിക്കുന്ന സിനിമയുടെ ചിത്രീകരണം ആരംഭിച്ചു. കാളിദാസിന് പുറമെ, നമിത പ്രമോദ്, റീബ മോണിക്ക എന്നിവരും ചിത്രത്തിൽ മുഖ്യകഥാപാത്രങ്ങളായി വേഷമിടുന്നുണ്ട്.
നവരസ ഫിലിംസിന്റെ ബാനറില്‍ ശ്രീജിത്ത് കെ എസ്, ബ്ലെസി ശ്രീജിത്ത് എന്നിവർ ചേര്‍ന്നാണ് ചിത്രം നിര്‍മ്മിക്കുന്നത്. ചിത്രത്തിന്റെ ഛായാഗ്രഹണം നിർവഹിക്കുന്നത് ജെബിൻ ജേക്കബ് ആണ്.
ഒരുപിടി മികച്ച ചിത്രങ്ങളുമായി മലയാള സിനിമയിൽ തിരക്കുള്ള താരമായി മാറിക്കഴിഞ്ഞു കാളിദാസ് ജയറാം. താരം മുഖ്യകഥാപാത്രത്തെ അവതരിപ്പിച്ച ഏറ്റവും പുതിയ ചിത്രമാണ് ബാക്ക് പാക്കേഴ്‌സ്. ‘രൗദ്രം’ എന്ന സിനിമയ്ക്ക് ശേഷം ജയരാജ് സംവിധാനം ചെയ്ത ചിത്രം ഒടിടി പ്ലാറ്റ്‌ഫോമായ റൂട്ട്സിലൂടെയാണ് പ്രേക്ഷകരിലേക്കെത്തിയത്. മികച്ച സ്വീകാര്യതാണ് ചിത്രത്തിന് ലഭിച്ചത്.
Read also:‘ജീവാംശമായ് താനേ…’ ആസ്വദിച്ച് പാടി ശ്രീനന്ദയും റിച്ചൂട്ടനും; പാട്ടിലലിഞ്ഞ് കൈലാസ് മേനോൻ
സത്യൻ അന്തിക്കാട് ചിത്രമായ കൊച്ചു കൊച്ചു സന്തോഷങ്ങളിലൂടെ ബാലതാരമായാണ് കാളിദാസ് സിനിമാ ലോകത്തേക്ക് എത്തുന്നത്. എന്റെ വീട് അപ്പൂന്റേം എന്ന ചിത്രത്തിലെ അഭിനയത്തിന് മികച്ച ബാലനടനുള്ള സംസ്ഥാന, ദേശീയ പുരസ്‌കാരങ്ങൾ കാളിദാസ് സ്വന്തമാക്കി. പൂമരം എന്ന ചിത്രത്തിലൂടെയാണ് മലയാള സിനിമയിൽ കാളിദാസ് നായകനായി എത്തിയത്.
Story Highlights:Kalidas Jayaram new movie
