‘കഥാപാത്രങ്ങളെപ്പോലെ നിമിഷാർദ്ധം കൊണ്ട് മനുഷ്യന്റെ ഹൃദയം കൈയ്യേറുന്ന മജീഷ്യൻ’- മോഹൻലാലിനെക്കുറിച്ച് ‘ട്വൽത്ത് മാൻ’ തിരക്കഥാകൃത്ത്
ജീത്തു ജോസഫിന്റെ സംവിധാനത്തിൽ മോഹൻലാൽ നായകനായ പുതിയ ചിത്രമാണ് ‘ട്വൽത്ത് മാൻ’. മിസ്റ്ററി ത്രില്ലറായി ഒരുങ്ങുന്ന ചിത്രത്തിൽ മോഹൻലാലിന് പുറമെ ഒട്ടേറെ താരങ്ങൾ വേഷമിടുന്നുണ്ട്. ഇടുക്കി നാടുകാണിയിലാണ് സിനിമയുടെ ഷൂട്ടിംഗ് നടന്നത്. കെ ആർ കൃഷ്ണകുമാറിന് ചിത്രത്തിന് തിരക്കഥ ഒരുക്കിയിരിക്കുന്നത്. ഷൂട്ടിങ്ങിനിടയിൽ പറഞ്ഞാൽ തീരാത്ത കഥകളാണ് മോഹൻലാൽ തന്നോട് പറഞ്ഞതെന്ന് പങ്കുവയ്ക്കുകയാണ് കെ ആർ കൃഷ്ണകുമാർ.
കൃഷ്ണകുമാറിന്റെ വാക്കുകൾ;
കഥകളുടെ കെട്ടഴിച്ച ആ രാത്രിയിൽ എൻ്റെ കൗമാര യൗവ്വനങ്ങളെ ത്രസിപ്പിച്ച എത്രയെത്ര കഥാപാത്രങ്ങളാണ് കടന്നു വന്നത്. സോളമൻ…. ജയകൃഷ്ണൻ…. ബാലൻ… ജീവൻ….. സേതുമാധവൻ…. ലാൽ…. നെട്ടൂരാൻ…. നീലകണ്ഠൻ..എത്ര കഥകളാണ് ലാലേട്ടനിൽ നിന്നും നേരിട്ട് കേൾക്കാൻ ഭാഗ്യമുണ്ടായത്. എൻ്റെ നാട്ടുകാരൻ കൂടിയായ പപ്പേട്ടൻ എന്ന പി.പത്മരാജനുമായുള്ള ആത്മബന്ധത്തെക്കുറിച്ച്… മുന്തിരിത്തോപ്പുകളുടെ ഷൂട്ടിംഗ് സമയത്ത് രാത്രി ടാങ്കർ ലോറിയിൽ രണ്ടു പേരും കൂടി കറങ്ങി നടന്നതിനെക്കുറിച്ച്.. മഞ്ഞുകാലം നോറ്റ കുതിര എഴുതാൻ കാരണമായ സംഭവത്തെക്കുറിച്ച്… രണ്ടു മൃഗങ്ങൾ ഏറ്റു മുട്ടുന്നതു പോലെ ഭരതേട്ടൻ്റെ താഴ്വാരത്തിലെ ക്ലൈമാക്സ് സംഘട്ടനം ചിത്രീകരിച്ചതിനെക്കുറിച്ച്… ലാൽസലാമിലെ… വാസ്തുഹാരയിലെ.. സീസണിലെ ഒക്കെ അനുഭവങ്ങൾ. നാടകം ചെയ്തതിനെക്കുറിച്ച്…മാജിക് അവതരിപ്പിച്ചത്…പറഞ്ഞാലും എഴുതിയാലും തീരാത്ത എത്ര കഥകൾ ആ രാത്രിയിൽ പറഞ്ഞു.തൻ്റെ കഥാപാത്രങ്ങളെപ്പോലെ നിമിഷാർദ്ധം കൊണ്ട് മനുഷ്യൻ്റെ ഹൃദയം കൈയ്യേറുന്ന മജീഷ്യൻ.
Read More: സുരേഷ് ഗോപിയുടെ കാവല്‍ പ്രേക്ഷകരിലേക്ക്
മോഹൻലാലിന് പുറമെ ഉണ്ണി മുകുന്ദൻ, സൈജു കുറുപ്പ്, അനുസിത്താര, അനുശ്രീ, അദിതി രവി, പ്രിയങ്ക നായർ, ലിയോണ ലിഷോയ്, ശിവദ തുടങ്ങി ഒട്ടനവധി താരങ്ങൾ ചിത്രത്തിൽ വേഷമിടുന്നുണ്ട്. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആണ് ചിത്രം നിർമ്മിക്കുന്നത്.
Story highlights- 12th man script writer about mohanlal
