ഇന്ത്യയിൽ 24 മണിക്കൂറിനിടെ കൊവിഡ് സ്ഥിരീകരിച്ചത് 16,862 പേർക്ക്; സജീവ രോഗികളുടെ എണ്ണത്തിലും കുറവ്
കൊവിഡ് 19 എന്ന മഹാമാരിയിൽ നിന്നും അതിജീവനത്തിനായി പോരാടുകയാണ് രാജ്യം. നാളുകൾ ഏറെയായി കൊവിഡ് പോരാട്ടം തുടങ്ങിയിട്ട്. പ്രതിരോധ പ്രവർത്തനങ്ങൾ ശക്തമായി പുരോഗമിക്കുമ്പോഴും പൂർണമായും നിയന്ത്രണ വിധേയമായിട്ടില്ല വൈറസ് വ്യാപനം. എങ്കിലും പ്രതിദിനം സ്ഥിരീകരിക്കുന്ന കൊവിഡ് കേസുകളിലെ കുറവ് നേരിയ ആശ്വാസം പകരുന്നു.
കേന്ദ്ര ആരോഗ്യ മന്ത്രാലയത്തിന്റെ ഏറ്റവും പുതിയ കണക്കുകൾ പ്രകാരം കഴിഞ്ഞ 24 മണിക്കൂറിനിടെ 16,862 പേർക്കാണ് രാജ്യത്ത് കൊവിഡ് രോഗം സ്ഥിരീകരിച്ചത്. നിലവിൽ രാജ്യത്തിന്റെ വിവിധ ഇടങ്ങളിലായി 2,03,678 പേർ കൊവിഡ് രോഗത്തിന് ചികിത്സയിൽ കഴിയുന്നുണ്ട്. ആകെ രോഗബാധിതരുടെ എണ്ണത്തിന്റെ 0.60 ശതമാനമാണ് നിലവിൽ സജീവ രോഗികളുടെ എണ്ണം.
Read more: ഉയരം 215.16 സെന്റീമീറ്റർ; ലോകത്തിലെ ഏറ്റവും ഉയരംകൂടിയ പെൺകുട്ടി എന്ന റെക്കാർഡ് ഈ മിടുക്കിക്ക്
കഴിഞ്ഞ ഒരു ദിവസത്തിനിടെ 379 കൊവിഡ് മരണങ്ങളും രാജ്യത്ത് റിപ്പോർട്ട് ചെയ്യപ്പെട്ടു. 4,51,814 പേരുടെ ജീവനാണ് രാജ്യത്താകെ ഇതുവരെ കൊവിഡ് കവർന്നത്. അതേസമയം രോഗമുക്തി നിരക്കിലും രാജ്യത്ത് വർധനവുണ്ട്. 24 മണിക്കൂറിനിടെ 19,391 പേരാണ് രാജ്യത്ത് രോഗമുക്തരായത്. ഇതോടെ രാജ്യത്താകെ കൊവിഡ് മുക്തരായവരുടെ എണ്ണം 3,33,82,100 ആയി. 98.07 ശതമാനമാണ് നിലവിൽ രാജ്യത്തെ കൊവിഡ് രോഗമുക്തി നിരക്ക്.
Story highlights: 16,862 New COVID-19 Cases in India
