കോശി കുര്യനെ നേരിടാൻ അയ്യപ്പൻ നായർ; ശ്രദ്ധനേടി ‘ഭീംല നായക്’ വിഡിയോ
സച്ചിയുടെ സംവിധാനത്തിൽ ഒരുങ്ങി ബിജു മേനോനും പൃഥ്വിരാജ് സുകുമാരനും മുഖ്യകഥാപാത്രങ്ങളായ ചിത്രമാണ് അയ്യപ്പനും കോശിയും. സിനിമ ആസ്വാദകർ ഇരുകൈകളും നീട്ടി സ്വീകരിച്ച ചിത്രത്തിന്റെ തെലുങ്ക് പതിപ്പ് ഒരുങ്ങുമ്പോൾ, ഏറെ ശ്രദ്ധനേടുകയാണ് ചിത്രത്തിന്റേതായി പുറത്തുവരുന്ന ഓരോ വിശേഷങ്ങളും. ഭീംല നായക് എന്ന് പേരിട്ടിരിക്കുന്ന ചിത്രത്തിൽ മുഖ്യകഥാപാത്രത്തെ അവതരിപ്പിക്കുന്നത് പവൻ കല്യാൺ, റാണ ദഗ്ഗുബദി എന്നിവരാണ്. ദീപാവലിയോട് അനുബന്ധിച്ച് പുറത്തുവിട്ടിരിക്കുന്ന ചിത്രത്തിന്റെ ഒരു പ്രൊമോ വിഡിയോയാണ് ഇപ്പോൾ ഏറെ ശ്രദ്ധയാകർഷിക്കുന്നത്.
വെടിമരുന്ന് ഉപയോഗിച്ച് കോശി കുര്യന്റെ വണ്ടി കത്തിക്കുന്ന അയ്യപ്പൻ നായരുടെ രംഗമാണ് ഇപ്പോൾ അണിയറപ്രവർത്തകർ പുറത്തുവിട്ടിരിക്കുന്നത്. അയ്യപ്പനും കോശിയും എന്ന ചിത്രത്തിൽ ബിജു മേനോൻ അവതരിപ്പിച്ച കഥാപാത്രത്തെയാണ് പവൻ കല്യാൺ അവതരിപ്പിക്കുന്നത്. പൃഥ്വിരാജ് അവതരിപ്പിച്ച കഥാപാത്രമായി റാണ ദഗുബട്ടിയാണ് വേഷമിടുന്നത്.
സച്ചി സംവിധാനം ചെയ്ത ചിത്രം സാഗർ കെ ചന്ദ്രയാണ് തെലുങ്കിൽ സംവിധാനം ചെയ്യുന്നത്‌. സിതാര എന്റർടൈൻമെന്റ്സാണ് നിർമാണം. തമൻ ആണ് ചിത്രത്തിന്റെ സംഗീത സംവിധാനം നിർവഹിക്കുന്നത്. നിത്യ മേനോൻ ആണ് ചിത്രത്തിൽ നായികയായി വേഷമിടുന്നത്. 2022 ജനുവരി 12 ന് ചിത്രം തിയേറ്ററുകളിൽ എത്തും എന്നാണ് അണിയറപ്രവർത്തകർ അറിയിക്കുന്നത്.
Read also; മരയ്ക്കാർ സെറ്റിൽ അപ്രതീക്ഷിത സന്ദർശനം നടത്തി തല; കുശലം പറഞ്ഞ് ലാലേട്ടൻ, വിഡിയോ
അതേസമയം മലയാളത്തില്‍ നിന്നും ചെറിയ മാറ്റങ്ങളോടെയാണ് തെലുങ്ക് പതിപ്പ് ഇറങ്ങുക. അയ്യപ്പനും കോശിയും എന്ന ചിത്രത്തില്‍ വില്ലന്‍ സ്വഭാവമുള്ള കോശി കുര്യന്‍ എന്ന കഥാപാത്രത്തെ പൃഥ്വിരാജ് അതിന്റെ പൂര്‍ണ്ണതയിലെത്തിച്ചു. അട്ടപ്പാടിയിലെ സബ് ഇന്‍സ്‌പെക്ടര്‍ അയ്യപ്പനായാണ് ചിത്രത്തില്‍ ബിജു മേനോന്‍ എത്തുന്നത്. മികച്ച പ്രകടനം തന്നെയാണ് ചിത്രത്തില്‍ ബിജു മേനോന്‍ കാഴ്ചവയ്ക്കുന്നതും. അതിനാൽ ഈ കഥാപാത്രങ്ങളെ തെലുങ്കിൽ എത്തിക്കുമ്പോൾ മികച്ച പ്രതീക്ഷയിലാണ് സിനിമ പ്രേമികൾ.
Story highlights; Bheemla Nayak promo video
