ട്രാക്കിൽ ആവേശം നിറച്ച മഡ്ഡി; ശ്രദ്ധനേടി അഡ്വഞ്ചറസ് ആക്ഷൻ ത്രില്ലർ ചിത്രത്തിന്റെ മേക്കിങ് വിഡിയോ
അതിസാഹസീകത നിറഞ്ഞ മഡ് റേസിങ് പ്രമേയമാക്കി ഒരുക്കിയ ചിത്രമാണ് മഡ്ഡി. തിയേറ്ററുകളിൽ മികച്ച സ്വീകാര്യത നേടിക്കൊണ്ടിരിക്കുന്ന ചിത്രത്തിന്റെ മേക്കിങ് വിഡിയോയാണ് ഇപ്പോൾ ഏറെ ശ്രദ്ധിക്കപ്പെടുന്നത്. ട്രാക്കിൽ ആവേശം നിറയ്ക്കുന്ന വിഡിയോ ഇതിനോടകം നിരവധിപ്പേർ ഏറ്റെടുത്തുകഴിഞ്ഞു. ചിത്രത്തിന്റേതായി പുറത്തുവന്ന ടീസറും ട്രെയ്‌ലറുമടക്കം തരംഗമായിരുന്നു.
നവാഗതനായ പ്രഗഭൽ ആണ് ചിത്രത്തിന്റെ സംവിധാനം നിർവഹിക്കുന്നത്. പി കെ സെവൻ ക്രിയേഷൻസിന്റെ ബാനറിൽ പ്രേമ കൃഷ്ണദാസ് ആണ് ചിത്രത്തിന്റെ നിർമാണം. ബഹുഭാഷയിൽ ഒരുങ്ങുന്ന ചിത്രം കൂടിയാണ് മഡ്ഡി. മലയാളത്തിന് പുറമെ തമിഴ്, തെലുങ്ക്, കന്നഡ, ഹിന്ദി, ഇംഗ്ലീഷ് ഭാഷകളിലും ചിത്രം പ്രേക്ഷകരിലേക്കെത്തും.
ചിത്രത്തിൽ കേന്ദ്ര കഥാപാത്രങ്ങളായെത്തുന്നവരെല്ലാം തന്നെ പുതുമുഖങ്ങളാണ്. അഡ്വഞ്ചറസ് ആക്ഷൻ ത്രില്ലറാണ് ഈ ചിത്രം. മഡ് റേസിങ്, ചെളിയിലുള്ള സംഘട്ടനങ്ങൾ തുടങ്ങിയവയൊക്കെ ഇടം നേടിയിട്ടുണ്ട് ചിത്രത്തിൽ. ചിത്രത്തിലെ മിക്ക സാഹസിക രംഗങ്ങളും ചെളിയിൽ തന്നെയാണ് ചിത്രീകരിച്ചിരിക്കുന്നതും. അഞ്ച് വർഷത്തോളമെടുത്തു സിനിമയുടെ പൂർത്തീകരണത്തിനായി. കേന്ദ്രകഥാപാത്രങ്ങൾ രണ്ട് വർഷത്തോളം മഡ് റേസിങ്ങിൽ പരിശീലനവും നേടി. ഡ്യൂപ്പുകൾ ഇല്ലാതെയാണ് സാഹസികത നിറഞ്ഞ രംഗങ്ങൾ ചിത്രീകരിച്ചത് എന്നതാണ് സിനിമയുടെ മറ്റൊരു പ്രത്യേകത.
പുതുമുഖങ്ങളായ യുവാൻ, റിദ്ദാൻ കൃഷ്ണ, അനുഷ സുരേഷ്, അമിത് ശിവദാസ് നായർ എന്നിവർക്കൊപ്പം ഹരീഷ് പേരാടി, ശോഭ മോഹൻ, ഐഎം വിജയൻ, രൺജി പണിക്കർ, സുനിൽ സുഗത, ഗിന്നസ് മനോജ് തുടങ്ങി നിരവധി താരങ്ങളും അണിനിരക്കുന്നുണ്ട് ചിത്രത്തിൽ.
Story highlights; Muddy Making Video goes viral
