സിനിമകണ്ട പ്രേക്ഷകരുടെ പ്രതികരണമറിയാൻ വേഷം മാറി തിയേറ്ററിലെത്തി സായ് പല്ലവി- വിഡിയോ
നൃത്തവേദിയിൽ നിന്നും സിനിമാലോകത്തേക്ക് എത്തിയ നടിയാണ് സായ് പല്ലവി. ആദ്യ ചിത്രമായ പ്രേമം ഹിറ്റായതോടെ മലർ മിസ് എന്ന കഥാപാത്രമായി എത്തിയ സായ് പല്ലവി തെന്നിന്ത്യയിൽ സജീവമായി. നൃത്തത്തിലെ മെയ്‌വഴക്കം പിന്നീട് സായ് പല്ലവി അഭിനയിച്ച ചിത്രങ്ങളിലെല്ലാം കാണാൻ സാധിക്കും. സായ് പല്ലവി പ്രധാന വേഷത്തിൽ എത്തുന്ന ചിത്രമാണ് ശ്യാം സിംഗ റോയ്. ചിത്രത്തിന്റെ റിലീസുമായി ബന്ധപ്പെട്ട ഒരു വിഡിയോയാണ് ഇപ്പോൾ ശ്രദ്ധനേടുന്നത്.
ചിത്രം കാണാനായി ഹൈദരാബാദിലെ തിയേറ്ററിൽ വേഷം മാറി എത്തിയിരിക്കുകയാണ് സായ് പല്ലവി. ജനങ്ങൾക്കൊപ്പമിരുന്ന് ചിത്രം കാണുന്ന സായ് പല്ലവി സിനിമ കണ്ടിറങ്ങിയതിന് ശേഷമാണ് മുഖം വെളിപ്പെടുത്തിയത്. തന്റെ സിനിമയോടുള്ള പ്രേക്ഷകരുടെ പ്രതികരണത്തിന് സാക്ഷ്യം വഹിക്കാൻ ആണ് നടി വേഷം മാറി എത്തിയത്.
രാഹുൽ സംകൃത്യൻ സംവിധാനം ചെയ്യുന്ന ഒരു പീരിയഡ് ചിത്രമാണ് ശ്യാം സിംഗ റോയ്. സിനിമയിൽ സായി പല്ലവിക്കൊപ്പം നാനി ഒരു ബംഗാളി കഥാപാത്രമായി എത്തുന്നു. ഹൈദരാബാദിൽ 10 ഏക്കർ സ്ഥലത്ത് കൊൽക്കത്തയുമായി സാമ്യമുള്ള ഒരു വലിയ സെറ്റ് സ്ഥാപിച്ചാണ് ചിത്രത്തിന്റെ ഷൂട്ടിംഗ് പൂർത്തിയാക്കിയത്. കലാസംവിധായകൻ അവിനാശ് കൊല്ലയാണ് സെറ്റ് ഒരുക്കിയത്.
Read Also: ‘അമ്പലക്കര തെച്ചിക്കാവില് പൂരം..’- ശ്രീഹരിക്കൊപ്പം ചേർന്ന് എം ജി ശ്രീകുമാറും; ഹൃദ്യമായ പ്രകടനം
സത്യദേവ് ജംഗയാണ് ചിത്രത്തിന്റെ രചന നിർവഹിച്ചിരിക്കുന്നത്. ചിത്രത്തിൽ കൃതി ഷെട്ടി, മഡോണ സെബാസ്റ്റ്യൻ, ജിഷു സെൻഗുപ്ത, രാഹുൽ രവീന്ദ്രൻ, മുരളി ശർമ, അഭിനവ് ഗോമാതം എന്നിവർ പ്രധാന കഥാപാത്രങ്ങളെ അവതരിപ്പിക്കുന്നു. സംഗീത സംവിധായകൻ മിക്കി ജെ മേയർ, ഛായാഗ്രാഹകൻ സാനു ജോൺ വർഗ്ഗീസ്, എഡിറ്റർ നവീൻ നൂലി എന്നിവരാണ് ശ്യാം സിംഗ റോയിയുടെ അണിയറയിൽ പ്രവർത്തിക്കുന്നത്.
Story highlights- Sai Pallavi secretly watches her movie ‘Shyam Singha Roy’ in theatre wearing ‘burqa’
