സാമന്തയുടെ നായകനായി ഉണ്ണി മുകുന്ദൻ; ‘യശോദ’ ഒരുങ്ങുന്നു
നടി സാമന്ത പ്രധാന കഥാപാത്രത്തെ അവതരിപ്പിക്കുന്ന ബഹുഭാഷാ ചിത്രമാണ് ‘യശോദ’. ചിത്രത്തിൽ ഒരു പ്രധാന കഥാപാത്രത്തെ അവതരിപ്പിക്കുന്നത് മലയാള താരം ഉണ്ണി മുകുന്ദൻ ആണ്. സാമന്തയുടെ നായകവേഷത്തിലെത്തുന്ന സന്തോഷം ഉണ്ണി മുകുന്ദൻ തന്നെയാണ് സമൂഹമാധ്യമങ്ങളിൽ പങ്കുവെച്ചത്.
‘ടീമിന് നന്ദി, ഗൗതമായി യശോദയുടെ ലോകത്തിൽ ചേരുന്നതിൽ ഞാൻ വളരെ ആവേശത്തിലാണ്. ശ്രീദേവിമൂവീസ് ബാനറിൽ കൃഷ്ണപ്രസാദ്ശിവാലെങ്ക ഒരുക്കുന്ന സാമന്ത റൂത്ത് പ്രഭു അഭിനയിക്കുന്ന ഒരു ബഹുഭാഷാ ചിത്രം’- ഉണ്ണി മുകുന്ദൻ കുറിക്കുന്നു. ‘ഭാഗമതി’, ‘ജനതാ ഗാരേജ്’ എന്നീ ചിത്രങ്ങളിൽ പ്രധാന വേഷങ്ങൾ ചെയ്തുകൊണ്ട് നടൻ ഉണ്ണി മുകുന്ദൻ ഇതിനകം തെലുങ്ക് ഇൻഡസ്‌ട്രിയിൽ ചുവട് ഉറപ്പിച്ചിരുന്നു. ഹൊറർ-ആക്ഷൻ സിനിമയായിരുന്ന ‘ഭാഗമതി’ യിൽ ഉണ്ണി മുകുന്ദൻ ശക്തി എന്ന കഥാപാത്രത്തെയാണ് അവതരിപ്പിച്ചത്. നടി അനുഷ്‌ക ഷെട്ടിയായിരുന്നു ചിത്രത്തിൽ നായിക. നടൻ രവി തേജയെ നായകനാക്കി രമേശ് വർമ്മ സംവിധാനം ചെയ്യുന്ന തെലുങ്ക് ക്രൈം-ആക്ഷൻ ചിത്രമായ ‘ഖിലാഡി’യിൽ ഉണ്ണി മുകുന്ദനും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്.
വില്ലൻ വേഷത്തിലാണ് എത്തുന്നതെന്ന സൂചനയുണ്ടെങ്കിലും നടനോ അണിയറപ്രവർത്തകരോ ഈ വാർത്തയോട് പ്രതികരിച്ചിട്ടില്ല. ഉണ്ണി മുകുന്ദന് പുറമെ തമിഴ് താരം അർജുനും ഖിലാഡിയിൽ പ്രധാന വേഷത്തിൽ എത്തുന്നുണ്ട്. രമേശ് വർമ്മ സംവിധാനം ചെയ്യുന്ന ചിത്രത്തിൽ ഡിംപിൾ ഹ്യാട്ടിയാണ് നായിക. സുജിത്ത് വാസുദേവാണ് ചിത്രത്തിന്റെ ഛായാഗ്രഹണം. സത്യനാരായണ കേന്നേറുവാന് ചിത്രം നിർമിച്ചിരിക്കുന്നത്. ദേവി ശ്രീ പ്രസാദാണ് ചിത്രത്തിന്റെ സംഗീത സംവിധായകൻ.
അതേസമയം നിരവധി ചിത്രങ്ങളാണ് ഉണ്ണി മുകുന്ദന്റേതായി അണിയറയിൽ ഒരുങ്ങുന്നത്. ഉണ്ണി മുകുന്ദൻ പ്രധാന കഥാപാത്രത്തെ അവതരിപ്പിക്കുന്ന ‘മേപ്പടിയാൻ’ എന്ന സിനിമയുടെ ചിത്രീകരണം പൂർത്തിയാക്കി, ചിത്രത്തിന്റെ പോസ്റ്റ് പ്രൊഡക്ഷൻ വർക്കുകൾ നടക്കുന്നുണ്ട്. ഉണ്ണി മുകുന്ദനൊപ്പം അഞ്ചു കുര്യൻ പ്രധാന കഥാപാത്രത്തെ അവതരിപ്പിക്കുന്ന സിനിമ ഉണ്ണി മുകുന്ദൻ ഫിലിംസിന്റെ ബാനറിൽ ഉണ്ണി മുകുന്ദനാണ് നിർമിക്കുന്നത്. ചിത്രം സംവിധാനം ചെയ്യുന്നത് വിഷ്ണു മോഹനാണ്.
Read More: വ്യത്യസ്ത ഭാവങ്ങളിൽ ദുൽഖർ സൽമാൻ; ‘ഹേ സിനാമിക’ പ്രേക്ഷകരിലേക്ക്
ഉണ്ണി മുകുന്ദന്റേതായി അണിയറയിൽ ഒരുങ്ങുന്ന മറ്റൊരു ചിത്രമാണ് ‘ബ്രൂസ്‌ ലീ’. വൈശാഖ് സംവിധാനം ചെയ്യുന്ന ചിത്രം 25 കോടിയോളം മുതൽ മുടക്കിലാണ് ഒരുങ്ങുന്നത്. മാസ് ആക്ഷൻ എന്റർടൈനർ നിർമിക്കുന്നത് ഉണ്ണി മുകുന്ദൻ ഫിലിംസിന്റെ ബാനറിൽ ആണ്.
Story highlights- Samantha Ruth Prabhu’s film ‘Yashoda’ will have Unni Mukundan
