‘പൊട്ടുതൊട്ട പൗർണമി…’ പ്രണയം പങ്കുവെച്ച് കല്യാണിയും പ്രണവും, വിഡിയോ ഗാനം
മലയാള സിനിമാലോകത്തിന് ആവേശം പകർന്നാണ് ഹൃദയം സിനിമ പ്രേക്ഷകരിലേക്ക് എത്തിയത്. വിനീത് ശ്രീനിവാസന്റെ സംവിധാനത്തിൽ പ്രണവ് മോഹൻലാൽ നായകനായ ചിത്രം മികച്ച പ്രതികരണം നേടുകയാണ്. രണ്ടരവർഷത്തോളമുള്ള കാത്തിരിപ്പിന്റെ ശേഷമാണ് ചിത്രം പ്രേക്ഷകരിലേക്ക് എത്തിയത്. ചിത്രത്തിലെ കഥാപാത്രങ്ങളെപ്പോലെത്തന്നെ ചിത്രത്തിലെ പാട്ടുകളും ഏറെ പ്രേക്ഷകപ്രീതി നേടിയിരുന്നു.
ഇപ്പോഴിതാ പാട്ടുകൾക്ക് പ്രാധാന്യം നൽകി ഒരുക്കിയിരിക്കുന്ന സിനിമയിലെ ഒരു വിഡിയോ ഗാനം പുറത്തുവിട്ടിരിക്കുകയാണ് അണിയറപ്രവർത്തകർ. ‘പൊട്ട് തൊട്ട പൗർണമി’ എന്നാരംഭിക്കുന്ന ഗാനം ആലപിച്ചിരിക്കുന്നത് സച്ചിൻ ബാലു മേഘ്‌ന ജോസുകുട്ടി എന്നിവർ ചേർന്നാണ്. കൈതപ്രത്തിന്റെ വരികൾക്ക് ഹിഷാം അബ്ദുൽ വഹാബാണ് സംഗീതം പകർന്നിരിക്കുന്നത്. കല്യാണിയുടെയും പ്രണവിന്റെയും പ്രണയമാണ് ഗാനത്തിന്റെ മുഖ്യാകർഷണം.
കോളജ് കാലഘട്ടത്തിന്റെ പശ്ചാത്തലത്തിൽ പാട്ടുകൾക്ക് പ്രാധാന്യം നല്കികൊണ്ട് ഒരുങ്ങുന്ന ചിത്രമാണ് ഹൃദയം. പ്രണവിനൊപ്പം കല്യാണി പ്രിയദർശൻ, ദർശന രാജേന്ദ്രൻ എന്നിവരും ചിത്രത്തിൽ അഭിനയിക്കുന്നുണ്ട്. മെറിലാൻഡ് സിനിമാസിന്റെയും ബിഗ് ബാംഗ് എന്റർടൈൻമെൻറ്സിന്റെയും ബാനറിൽ ആണ്ചിത്രം ഒരുങ്ങുന്നത്. വിശാഖ് സുബ്രഹ്മണ്യൻ നിർമിക്കുന്ന ചിത്രത്തിന്റെ ഛായാഗ്രഹണം വിശ്വജിത്ത് ഒടുക്കത്തിൽ ആണ്.
Story highlights: Chemistry between Pranav and Kalyani song out
