‘ഇനി താഴില്ല’; വൈറലായി രവീന്ദ്ര ജഡേജയുടെ പുഷ്പ ആഘോഷം
ഇന്ത്യൻ ക്രിക്കറ്റിലെ എക്കാലത്തെയും മികച്ച ഓൾ റൗണ്ടർമാരിലൊരാളാണ് രവീന്ദ്ര ജഡേജ. പലപ്പോഴും അസാധ്യമെന്ന് തോന്നുന്ന സാഹചര്യങ്ങളിൽ നിന്ന് ടീമിനെ കര കയറ്റിയ താരം കൂടിയാണ് രവീന്ദ്ര ജഡേജ. ഐപിഎല്ലിലും ജഡേജയുടെ കളിക്ക് ആരാധകർ ഏറെയാണ്. ചെന്നൈ സൂപ്പർകിങ്സിന് വേണ്ടി മികച്ച പ്രകടനം കാഴ്ചവെച്ചിട്ടുള്ള താരത്തിനെ ആരാധകർ സ്നേഹത്തോടെ വിളിക്കുന്ന പേരാണ് ‘സർ രവീന്ദ്ര ജഡേജ.’
ശ്രീലങ്കക്കെതിരെയുള്ള ഇന്നലത്തെ മത്സരത്തിൽ വിക്കറ്റ് നേടിയതിന് ശേഷം ജഡേജ നടത്തിയ ആഘോഷമാണ് ഇപ്പോൾ സമൂഹമാധ്യമങ്ങളിൽ വൈറലാവുന്നത്. കടുത്ത അല്ലു അർജുൻ ഫാനായ ജഡേജ പുഷ്പ സിനിമയെ ആസ്പദമാക്കിയുള്ള ആഘോഷമാണ് പുറത്തെടുത്തത്. ശ്രീലങ്കന്‍ താരം ദിനേശ് ചാന്ദിമലിന്റെ വിക്കറ്റ് വീഴ്ത്തിയ ശേഷമായിരുന്നു ജഡേജയുടെ പുഷ്പ സ്റ്റൈല്‍ ആഘോഷം. പത്താം ഓവറിലാണ് ചാന്ദിമലിനെ ജഡേജ വീഴ്ത്തുന്നത്. ജഡേജയുടെ പന്തില്‍ വിക്കറ്റ് കീപ്പര്‍ ഇഷാന്‍ കിഷന്‍ താരത്തെ സ്റ്റംപ് ചെയ്ത് പുറത്താക്കുകയായിരുന്നു. പിന്നാലെയാണ് ജഡേജ തന്റെ ആരാധന തുറന്നു കാണിച്ചത്.
Today #jadeja celebration on the field after the wicket
— Telugu Box office (@TCinemaFun) February 24, 2022
Commentator : That's Ravindra Pushpa for you 🔥🔥🔥#INDvsSL #INDvSL #India #pushpa #PushpaTheRise #AlluArjun #BheemlaNayak #Pawankalyan #BheemlaNaayak pic.twitter.com/iVAApeKRxl
അല്ലു അർജുന്റെ ‘പുഷ്പ’ ഇറങ്ങിയ നാൾ മുതൽ അതിലെ ഡയലോഗുകളും ഡാൻസ് നമ്പറുകളും സമൂഹമാധ്യമങ്ങളിൽ വൈറലാണ്. നേരത്തെ മുന്‍ ഇന്ത്യന്‍ ക്യാപ്റ്റന്‍ വിരാട് കോലിയും പുഷ്പയിലെ നൃത്തച്ചുവടുകള്‍ അനുകരിച്ചിരുന്നു. വെസ്റ്റ് ഇന്‍ഡീസിനെതിരെ നടന്ന രണ്ടാം ഏകദിന മത്സരത്തിനിടെയായിരുന്നു കോലി അല്ലുവിന്റെ നൃത്തച്ചുവടുകള്‍ ഗ്രൗണ്ടില്‍ അനുകരിച്ചത്. പുഷ്പയിലെ നൃത്തച്ചുവടുകളുമായി ഡേവിഡ് വാര്‍ണര്‍, ഹാര്‍ദിക് പാണ്ഡ്യ, റാഷിദ് ഖാന്‍, ജേസണ്‍ റോയ് എന്നിവരെല്ലാം ഇതിന് മുൻപ് രംഗത്തെത്തിയിരുന്നു.
ബെംഗളൂരുവിലെ ദേശീയ ക്രിക്കറ്റ് അക്കാദമിയിൽ ചികില്‍സയ്‌ക്കും പരിശീലനത്തിനും ശേഷമാണ് ജഡേജ ഇന്ത്യന്‍ ടീമിൽ തിരിച്ചെത്തിയിരിക്കുന്നത്. ടി 20 ലോകകപ്പ് ഈ വര്‍ഷം നടക്കാനിരിക്കേ രവീന്ദ്ര ജഡേജയുടെ തിരിച്ചുവരവ് ഏറെ പ്രതീക്ഷ നല്‍കുന്നതാണ്.
Story Highlights: Jadeja’s pushpa celebration
