പ്രണയം പറഞ്ഞ് കീർത്തി സുരേഷ്, ശ്രദ്ധനേടി ഗാനം
തെന്നിന്ത്യയിൽ നിരവധി ആരാധകരുള്ള താരമാണ് കീർത്തി സുരേഷ്. അതുകൊണ്ടുതന്നെ താരത്തിന്റെ സിനിമ വിശേഷങ്ങൾ ഏറെ കൗതുകത്തോടെയാണ് ആരാധകർ നോക്കിക്കാണുന്നതും. നിരവധി ചിത്രങ്ങളാണ് താരത്തിന്റേതായി അണിയറയിൽ ഒരുങ്ങുന്നത്. ഇപ്പോഴിതാ മഹേഷ് ബാബു ചിത്രത്തിലും താരമാകുകയാണ് കീർത്തി സുരേഷ്. സർക്കാരു വാരി പാട്ട എന്ന ചിത്രത്തിലാണ് കീർത്തി മഹേഷ് ബാബുവിനൊപ്പം അഭിനയിക്കുന്നത്. അതേസമയം ഏകദേശം രണ്ട് വർഷങ്ങൾക്ക് ശേഷമാണ് ഒരു മഹേഷ് ബാബു ചിത്രം തിയേറ്ററുകളിൽ എത്തുന്നത്.
പരശുറാം സംവിധാനം ചെയ്യുന്ന ചിത്രത്തിൽ ഇരട്ട വേഷത്തിലാണ് മഹേഷ് ബാബു വേഷമിടുന്നത് എന്നാണ് സൂചന. ഇപ്പോഴിതാ ഏപ്രിൽ ഒന്നിന് റിലീസ് ചെയ്യുന്ന ചിത്രത്തിലെ ഒരു ഗാനശകലം പുറത്തുവിട്ടിരിക്കുകയാണ് അണിയറപ്രവർത്തകർ. ‘കലാവതി’ എന്ന ഗാനത്തിന്‍റെ പ്രൊമോ വീഡിയോയാണ് അണിയറക്കാര്‍ പുറത്തിറക്കിയിരിക്കുന്നത്. അനന്ദ ശ്രീറാമിന്‍റെ വരികള്‍ക്ക് തമന്‍ എസ് ആണ് സംഗീതം പകര്‍ന്നിരിക്കുന്നത്. സിദ് ശ്രീറാമാണ് പാട്ട് പാടിയിരിക്കുന്നത്. അതേസമയം പ്രണയദിനത്തിലാണ് ഈ ഗാനം റിലീസ് ചെയ്യുക. പി എസ് വിനോദ് ഛായാഗ്രാഹണവും മാര്‍ത്താണ്ഡ് കെ വെങ്കടേഷ് ചിത്രത്തിന്റെ എഡിറ്റിങ്ങും നിർവഹിക്കുന്നു.
തെന്നിന്ത്യയുടെ പ്രിയ നായികയാണ് കീർത്തി സുരേഷ്. മലയാളത്തിനേക്കാൾ മറ്റു ഭാഷകളിലാണ് കീർത്തി കൂടുതൽ സ്വീകരിക്കപ്പെട്ടത്. തമിഴിലും തെലുങ്കിലും സാന്നിധ്യമറിയിച്ചതിന് പിന്നാലെ ബോളിവുഡിലേക്കും ചുവടുവയ്ക്കുകയാണ് കീർത്തി സുരേഷ്. അതേസമയം കീർത്തി സുരേഷിന്റേതായി നിരവധി ചിത്രങ്ങളും അണിയറയിൽ ഒരുങ്ങുന്നുണ്ട്. മലയാളത്തിൽ മരക്കാർ അറബിക്കടലിന്റെ സിംഹമാണ് താരത്തിന്റേതായി അവസാനം റിലീസ് ചെയ്തത്. തമിഴിൽ രജനീകാന്തിനൊപ്പമുള്ള അണ്ണാത്തെയാണ് താരത്തിന്റേതായി പുറത്തിറങ്ങിയത്.
Story highlights: Keerthy Suresh Kalaavathi Song Promo
