“മുഴുവൻ മനുഷ്യർക്കും പ്രചോദനമാണ് താങ്കളുടെ ജീവിതത്തിലേക്കുള്ള മടങ്ങിവരവ്”; യുവരാജിന്റെ കത്തിന് കോലിയുടെ മറുപടി

ഇന്ത്യയുടെ എക്കാലത്തെയും മികച്ച ക്രിക്കറ്റ് താരങ്ങളിലൊരാളായ യുവരാജ് സിങ് കഴിഞ്ഞ ദിവസമാണ് മുൻ ഇന്ത്യൻ ക്യാപ്റ്റനായ വിരാട് കോലിക്ക് വൈകാരികമായ ഒരു കത്തെഴുതിയത്. ഇപ്പോൾ യുവരാജ് സിങ്ങ് തനിക്കെഴുതിയ കത്തിന് മറുപടിയുമായി എത്തിയിരിക്കുകയാണ് വിരാട് കോലി. ക്രിക്കറ്റ് ലോകത്ത് മാത്രമല്ല മുഴുവൻ മനുഷ്യർക്കും യുവി വലിയ പ്രചോദനമാണെന്നാണ് കോലി പറയുന്നത്.

“യുവി ഈ കത്തിന് ഒരുപാട് നന്ദി. ക്യാൻസറിനെ തോൽപ്പിച്ച് ജീവിതത്തിലേക്കുള്ള താങ്കളുടെ മടങ്ങിവരവ് മുഴുവൻ മനുഷ്യർക്കും വലിയ പ്രചോദനമാണ്. നിങ്ങളുടെ ചുറ്റുമുള്ള മനുഷ്യരോട് എപ്പോഴും വലിയ സ്‌നേഹവും കരുതലും നിങ്ങൾ കാത്തുവച്ചിരുന്നു. നിങ്ങള്‍ക്ക് എല്ലാ ആശംസകളും നേരുന്നു”-. കോലി ട്വിറ്ററിൽ കുറിച്ചു. യുവരാജ് തനിക്കെഴുതിയ കത്തിന്‍റേയും സമ്മാനത്തിന്‍റേയും ചിത്രം ട്വിറ്ററില്‍ പങ്കുവച്ചാണ് കോലി മറുപടി എഴുതിയത്.

Read More: രക്ഷകനായി കെ.എൽ.രാഹുൽ; പക്ഷെ ഇത്തവണ കളിക്കളത്തിലല്ല ജീവിതത്തിൽ

നേരത്തെ ഡൽഹിയിലെ ആ കൊച്ചു പയ്യന് എന്ന മുഖവുരയോടെ ട്വിറ്ററിലാണ് യുവി വിരാടിനെഴുതിയ കത്ത് പങ്കുവെച്ചത്. പുതുതലമുറക്ക് വിരാട് വലിയ പ്രചോദനമാണെന്നും വ്യക്തി എന്ന നിലയിലും ക്രിക്കറ്റർ എന്ന നിലയിലും വിരാടിന്‍റെ വളർച്ചക്ക് താൻ സാക്ഷിയാണെന്നും യുവി കത്തില്‍ കുറിച്ചു.

“വിരാട് നീ ഒരിതിഹാസമാണ്. ക്രിക്കറ്റിനോടുള്ള നിന്റെ അടങ്ങാത്ത അഭിനിവേശം രാജ്യത്തിന്റെ നീല ജേഴ്‌സി സ്വപ്‌നം കണ്ട് ബാറ്റ് കയ്യിലെടുക്കുന്ന രാജ്യത്തെ ഓരോ കൊച്ചു കുട്ടിക്കും പ്രചോദനമാണ്. ക്രിക്കറ്റ് ലോകത്ത് ഒരുപാട് നേട്ടങ്ങൾ നീ കരസ്ഥമാക്കിയിട്ടുണ്ട്. താങ്കളൊരു മികച്ച ക്യാപ്റ്റനും ഒരിതിഹാസ നായകനുമാണ്”- യുവി കുറിച്ചു.

ക്യാപ്റ്റനായിരിക്കെ ലക്ഷക്കണക്കിന് ആരാധകരുടെ മുഖത്ത് പുഞ്ചിരി നിറക്കാൻ വിരാടിന് കഴിഞ്ഞുവെന്നും രാജ്യത്തിന്റെ യശസ്സ് വാനോളമുയർത്തിയ താങ്കൾ ഇനിയുമത് തുടരണമെന്നും യുവി ട്വീറ്റ് ചെയ്തു.

Story Highlights: Kohli’s reply to yuvraj’s letter