പ്രണയം പറഞ്ഞ് ഷിബു; ‘മിന്നൽ മുരളി’യിലെ പ്രേക്ഷകർ കാത്തിരുന്ന ഗാനമെത്തി
ചിത്രം പുറത്തിറങ്ങി മാസങ്ങൾ പിന്നിട്ടിട്ടും മിന്നൽ മുരളിയുടെ വിശേഷങ്ങൾ അവസാനിക്കുന്നില്ല.. ബേസിൽ ജോസഫ് സംവിധാനം നിർവഹിച്ച സൂപ്പർ ഹീറോ ചിത്രം മിന്നൽ മുരളിയിൽ പ്രധാന കഥാപാത്രത്തെ അവതരിപ്പിച്ച ടൊവിനോ തോമസിനൊപ്പം തന്നെ പ്രേക്ഷകപ്രീതി നേടിയതാണ് വില്ലൻ കഥാപാത്രത്തെ അവതരിപ്പിച്ച ഗുരു സോമസുന്ദരം. ചിത്രത്തിൽ പ്രണയിച്ച പെണ്ണിനെ സ്വന്തമാക്കുന്നതിനായി അതിന് തടസമായി നിന്നതിനെ മുഴുവൻ നശിപ്പിക്കുന്ന ഷിബു എന്ന കഥാപാത്രം പ്രേക്ഷകരുടെ ഉള്ളിൽ ആഴത്തിൽ ശ്രദ്ധിക്കപ്പെട്ടിരുന്നു. ഇപ്പോഴിതാ ഷിബുവിന്റെ പ്രണയം പറയുന്ന ഗാനം പുറത്തുവിട്ടിരിക്കുകയാണ് അണിയറപ്രവർത്തകർ.
രാവിൽ എന്ന് തുടങ്ങുന്ന പ്രണയഗാനമാണ് അണിയറപ്രവർത്തകർ പുറത്തുവിട്ടിരിക്കുന്നത്. സുഷിൻ ശ്യാമിന്റെ സംഗീതത്തിൽ ഒരുങ്ങിയ ഗാനത്തിന്റെ വരികൾ തയാറാക്കിയത് മനു മഞ്ജിത്താണ്. ആലാപനം പ്രദീപ് കുമാറാണ്. ഷിബുവിന്റെ പ്രണയം ദൃശ്യവത്‌കരിച്ചിരിക്കുന്ന ഗാനം ഇതിനോടകം സംഗീതപ്രേമികൾ നെഞ്ചേറ്റിയതാണ്. അതേസമയം ചിത്രം പുറത്തിറങ്ങിയതുമുതൽ മലയാളി ഹൃദയങ്ങൾ കീഴടക്കിയ വില്ലൻ എന്ന പേരിൽ പ്രേക്ഷകർ നെഞ്ചേറ്റിയതാണ് ഗുരു സോമസുന്ദരത്തെ.
Read also: ദുൽഖറിന്റെ നായികമാരായി അദിതിയും കാജൽ അഗർവാളും; പ്രണയവും സൗഹൃദവും പറഞ്ഞ് ‘ഹേ സിനാമിക’ ട്രെയ്‌ലർ
ഇടിമിന്നലേറ്റ് അമാനുഷീക ശക്തി ലഭിക്കുന്ന രണ്ട് പേരുടെയും അവരെ ചുറ്റിപ്പറ്റിയുള്ള ആളുകളിലൂടെയുമാണ് മിന്നൽ മുരളി മുന്നോട്ട് പോകുന്നത്. ടൊവിനോ തോമസിനെ നായകനാക്കി ബേസിൽ ജോസഫ് സംവിധാനം നിർവഹിച്ച ചിത്രത്തിൽ ഗുരു സോമസുന്ദരതിനൊപ്പം അജു വർഗീസ്, ബൈജു, ഹരിശ്രീ അശോകൻ, ഫെമിന ജോർജ് തുടങ്ങി നിരവധി താരങ്ങളും അണിനിരക്കുന്നുണ്ട്. മലയാളത്തിന് പുറമെ തമിഴ്, കന്നഡ, തെലുങ്ക്, ഹിന്ദി തുടങ്ങിയ ഭാഷകളിലും ചിത്രം റിലീസ് ചെയ്തിരുന്നു. ഗോദയ്ക്ക് ശേഷം ടൊവിനോ- ബേസിൽ കൂട്ടുകെട്ടിൽ പ്രേക്ഷകരിലേക്കെത്തിയ ചിത്രമാണ് മിന്നൽ മുരളി. ലോകശ്രദ്ധ പിടിച്ചുപറ്റിയ ചിത്രത്തിന് മികച്ച സ്വീകാര്യതയാണ് സിനിമ പ്രേമികളിൽ നിന്നും ലഭിച്ചുകൊണ്ടിരിക്കുന്നത്.
Story highlights: Ravil Video Song-Minnal Murali
