‘സിനിമയുമായുള്ള എന്റെ പ്രണയകഥ ഒരിക്കലും അവസാനിക്കില്ല..’- സിനിമയിൽ 12 വർഷം പൂർത്തിയാക്കി സാമന്ത
2010-ൽ യേ മായ ചേസാവേ എന്ന ചിത്രത്തിലൂടെ അരങ്ങേറ്റം കുറിച്ച സാമന്ത, സിനിമാ മേഖലയിൽ 12 വർഷം പൂർത്തിയാക്കിയിരിക്കുകയാണ്. 2010 ഫെബ്രുവരി 26-നായിരുന്നു നാഗ ചൈതന്യയ്‌ക്കൊപ്പം യേ മായ ചേസാവേ എന്ന ചിത്രത്തിലൂടെ അഭിനയരംഗത്തേക്ക് നടി എത്തിയത്. പ്രത്യേക ദിവസത്തിന്റെ അടയാളപ്പെടുത്തലായി ഹൃദയസ്പർശിയായ ഒരു കുറിപ്പ് പങ്കുവെച്ചിരിക്കുകയാണ് നടി.
‘ഇന്ന് ചലച്ചിത്രമേഖലയിൽ എന്റെ 12-ാം വർഷം ആഘോഷിക്കുന്നു. ലൈറ്റുകൾ, ക്യാമറ, ആക്ഷൻ, സമാനതകളില്ലാത്ത നിമിഷങ്ങൾ എന്നിവയെ ചുറ്റിപ്പറ്റിയുള്ള ഓർമ്മകളുടെ 12 വർഷമാണ്. ഈ അനുഗ്രഹീത യാത്രയിൽ ലോകത്തിലെ ഏറ്റവും മികച്ച, വിശ്വസ്തരായ ആരാധകരും ഉണ്ടായിരുന്നു..സിനിമയുമായുള്ള എന്റെ പ്രണയകഥ ഒരിക്കലും അവസാനിക്കില്ലെന്നും ശക്തിയിൽ നിന്ന് ശക്തിയിലേക്ക് പെരുകുമെന്നും പ്രതീക്ഷിക്കുന്നു.’- നടി കുറിക്കുന്നു.
ആദ്യ സിനിമയിൽ തന്നെ പ്രേക്ഷകരെ ആകർഷിക്കാൻ കഴിഞ്ഞ ചുരുക്കം ചില നടിമാരിൽ ഒരാളാണ് സാമന്ത. പിന്നീട് അവർ നിശ്ചയദാർഢ്യത്തോടെ താരപദവിയിലേക്ക് ഉയർന്നു, കൂടാതെ ചലച്ചിത്രമേഖലയിലെ തന്റെ 12 വർഷത്തെ യാത്രയിൽ ബ്ലോക്ക്ബസ്റ്റർ സിനിമകൾ നൽകി.
അല്ലു അർഹ, ദേവ് മോഹൻ എന്നിവരോടൊപ്പമുള്ള പുരാണ സിനിമയായ ശാകുന്തളം ഉൾപ്പെടെയുള്ള സിനിമകളുടെ തയ്യാറെടുപ്പിലാണ് സാമന്ത. നയൻതാരയ്ക്കും വിഘ്‌നേഷ് ശിവനുമൊപ്പമുള്ള മൾട്ടിസ്റ്റാറർ ചിത്രമായ കാത്തുവാക്കുള്ള രണ്ടു കാതൽ എന്ന ചിത്രവും ഏപ്രിൽ 28 ന് റിലീസ് ചെയ്യും. അറേഞ്ച്മെന്റ്സ് ഓഫ് ലവ് എന്ന തന്റെ ആദ്യ വിദേശ ചിത്രത്തിലും സാമന്ത ഒപ്പുവച്ചു കഴിഞ്ഞു. ഇതേ പേരിലുള്ള ഒരു നോവലിന്റെ ആവിഷ്‌കാരമാണ് ചിത്രം.
Story highlights- samantha about 12 years in cinema
