‘ഒരു മധുരക്കിനാവിൻ ലഹരിയിൽ’; പാട്ട് വേദിയെ ഇളക്കിമറിച്ച് അക്ഷിത്…
മലയാള സിനിമയിലെ എക്കാലത്തെയും സൂപ്പർഹിറ്റ് ഗാനങ്ങളിലൊന്നാണ് ‘കാണാമറയത്ത്’ എന്ന ചിത്രത്തിലെ ‘ഒരു മധുരക്കിനാവിൻ’ എന്ന ഗാനം. മലയാളികളുടെ പ്രിയപ്പെട്ട ഗാനഗന്ധർവൻ കെ ജെ യേശുദാസ് പാടിയ ഗാനത്തിൽ നടൻ റഹ്‌മാനാണ് പാടി അഭിനയിച്ചിരിക്കുന്നത്. മലയാളി പ്രേക്ഷകരെ എന്നും ഹരം പിടിപ്പിക്കുന്ന ഈ ഗാനവുമായി ടോപ് സിംഗർ വേദിയിലെത്തിയിരിക്കുകയാണ് പ്രേക്ഷകരുടെ പ്രിയപ്പെട്ട പാട്ടുകാരൻ അക്ഷിത്.
വേദിയെ ഇളക്കിമറിച്ച ഒരു പ്രകടനം തന്നെയാണ് അക്ഷിത് കാഴ്‌ചവെച്ചത്. അതിമനോഹരമായ ആലാപനത്തിലൂടെ പ്രേക്ഷകരെയും വിധികർത്താക്കളെയും ഒരേ പോലെ ആഘോഷത്തിലാക്കിയ അക്ഷിതിന് വലിയ കയ്യടിയാണ് ആലാപനത്തിന് ശേഷം ലഭിച്ചത്. ചിത്രത്തിൽ നടൻ റഹ്‌മാൻ കാഴ്‌ചവെച്ച അതേ ആവേശം ആവാഹിച്ച ഒരു പ്രകടനം കൂടിയായിരുന്നു അക്ഷിതിന്റേത്.
അവിശ്വസനീയമായ രീതിയിലാണ് ടോപ് സിംഗറിലെ പല ഗായകരും വേദിയുടെയും പ്രേക്ഷകരുടെയും മനസ്സ് കവരാറുള്ളത്. അത്തരത്തിൽ പ്രേക്ഷകരുടെ മനസ്സിൽ ഇടം നേടിയ കൊച്ചു പാട്ടുകാരൻ കൂടിയാണ് അക്ഷിത്.
മലയാളി പ്രേക്ഷകർ കേൾക്കാൻ ആഗ്രഹിക്കുന്ന നിത്യഹരിത ഗാനങ്ങളുമായാണ് ഓരോ ദിവസവും കുഞ്ഞ് ഗായകർ ടോപ് സിംഗർ വേദിയിലെത്താറുള്ളത്. അത് കൊണ്ട് തന്നെ പ്രായഭേദമന്യേ വലിയ പ്രേക്ഷകസമൂഹമാണ് ടോപ് സിംഗറിന്റെ ഓരോ എപ്പിസോഡിനായും കാത്തിരിക്കുന്നത്.
എം ജയചന്ദ്രൻ, എം ജി ശ്രീകുമാർ, അനുരാധ ശ്രീറാം എന്നിവരാണ് പാട്ടുവേദിയിലെ വിധികർത്താക്കൾ. പലപ്പോഴും വിധികർത്താക്കളുടെ പാട്ടുകൾ അവർക്ക് മുൻപിൽ തന്നെ ആലപിച്ച് വിധികർത്താക്കളെ അത്ഭുതപ്പെടുത്തിയിട്ടുണ്ട് ടോപ് സിംഗറിലെ കൊച്ചു പാട്ടുകാർ.
Story Highlights: Akshith’s performance
