തിയേറ്റർ സ്‌ക്രീനിൽ ബാറ്റ്മാൻ പ്രദർശനം; അപ്രതീക്ഷിതമായി പറന്നെത്തി ‘ബാറ്റ്’- രസികൻ കാഴ്ച
ആകസ്മികമായ ചില സംഭവങ്ങൾ കൗതുകം സമ്മാനിക്കുമ്പോൾ അത് ലോകം ഏറ്റെടുക്കാറുണ്ട്. അത്തരത്തിലൊരു രസികൻ വിശേഷമാണ് ഇപ്പോൾ ടെക്‌സാസിൽ നിന്ന് വന്നിരിക്കുന്നത്. വെള്ളിയാഴ്ച റിലീസ് ചെയ്ത ദി ബാറ്റ്മാന്റെ ഒരു ഓപ്പണിംഗ്-ഡേ സ്‌ക്രീനിങ്ങിനിടെ വളരെ അപ്രതീക്ഷിതമായി ഒരു വവ്വാലാണ് തിയേറ്ററിനുള്ളിലേക്ക് പറന്നെത്തിയത്. സ്‌ക്രീനിൽ ബാറ്റ്മാനും മുന്നിൽ ‘ബാറ്റും’ വന്നതോടെ കാണികൾക്കും കൗതുകമായി.
ഓസ്റ്റിനിലെ സിനിപോളിസ് മൂവിഹൗസ് ആൻഡ് ഈറ്ററിയിൽ ആണ് സംഭവം. തുടക്കത്തിൽ, സ്‌ക്രീനിലുടനീളം വവ്വാൽ പറക്കുന്നുണ്ട്. ഇതിനു പിന്നാലെ യഥാർത്ഥ വവ്വാൽ വട്ടം പറന്ന് കറങ്ങിയതിനാൽ യഥാർത്ഥത്തിൽ എന്താണ് സംഭവിക്കുന്നതെന്ന് ആദ്യം ആളുകൾക്ക് ആശങ്കയായി. പിന്നീടാണ് അതൊരു യഥാർത്ഥ വവ്വാൽ ആണെന്ന് ആളുകൾ തിരിച്ചറിഞ്ഞത്.
‘ഞാൻ ബാറ്റ്മാൻ സിനിമ കാണുകയായിരുന്നു. അപ്പോൾ തിയേറ്ററിൽ യഥാർത്ഥ വവ്വാലുകളുണ്ട്…’- വിഡിയോ പങ്കുവെച്ചയാൾ കുറിക്കുന്നു. എന്തായാലും കൗതുമായെങ്കിലും തടസ്സത്തെ തുടർന്ന് ചിത്രത്തിന്റെ പ്രദർശനം താൽക്കാലികമായി നിർത്തേണ്ടി വന്നു. 20 സെക്കൻഡ് ദൈർഘ്യമുള്ള വിഡിയോയിൽ തിയേറ്ററിന്റെ ഒരു വശത്ത് നിന്ന് മറുവശത്തേക്ക് വവ്വാൽ പറക്കുന്നത് കാണാം. സിനിമ താൽക്കാലികമായി നിർത്തി തിയേറ്ററിൽ ലൈറ്റുകൾ ഇടേണ്ടിവന്നു.
I’m at the Batman movie and there are real bats in the theater…. #Imcooloffthat pic.twitter.com/NdSkMITXQi
— J (@Jeremiah24_) March 5, 2022
മാറ്റ് റീവ്സ് സംവിധാനം ചെയ്യുകയും രചന നിർവ്വഹിക്കുകയും ചെയ്ത ദി ബാറ്റ്മാൻ ഒരുപാട് നാളുകളായി ആളുകൾ കാത്തിരുന്ന ചിത്രമാണ്. മാർച്ച് 4 ന് റിലീസ് ചെയ്ത ബാറ്റ്മാനിൽ റോബർട്ട് പാറ്റിൻസൺ, സോ ക്രാവിറ്റ്സ്, പോൾ ഡാനോ, ജെഫ്രി റൈറ്റ്, ജോൺ ടർതുറോ, പീറ്റർ സാർസ്ഗാർഡ്, ആൻഡി സെർക്കിസ്, കോളിൻ ഫാരെൽ എന്നിവർ പ്രധാന കഥാപാത്രങ്ങളെ അവതരിപ്പിക്കുന്നു.
Story highlights- bat flies into theatre during ‘The Batman’ screening
