ദുൽഖർ സൽമാൻ വേഷമിടുന്ന ആദ്യ വെബ് സീരിസ് ‘ഗൺസ് & ഗുലാബ്സ്’; താരത്തിനൊപ്പം രാജ്കുമാർ റാവുവും
ആരാധകരുടെ കാര്യത്തിൽ അതിരുകളില്ലെന്ന് തെളിയിച്ച നടനാണ് ദുൽഖർ സൽമാൻ. മലയാളത്തിന് പുറമെ ഒട്ടേറെ ഭാഷകളിൽ നായകനായി വേഷമിട്ട ദുൽഖർ പാൻ ഇന്ത്യൻ താരം എന്ന നിലയിൽ വിജയഗാഥ രചിക്കുകയാണ്. ഇപ്പോഴിതാ, താരം വെബ് സീരിസ് രംഗത്തേക്കും ചുവടുവെച്ചുകഴിഞ്ഞു. ഫിലിം മേക്കർ ജോഡികളായ ‘രാജ് & ഡികെ’ എന്നറിയപ്പെടുന്ന രാജ് നിഡിമോരുവും കൃഷ്ണ ഡികെയും ചേർന്ന് സംവിധാനം ചെയ്ത ‘ഗൺസ് & ഗുലാബ്സ്’ എന്ന വെബ് സീരിസിലൂടെയാണ് ദുൽഖർ തജുടക്കമിടുന്നത്. ദുൽഖർ സൽമാനു പുറമെ വെബ് സീരീസിലെ പ്രധാന കഥാപാത്രങ്ങളെ അവതരിപ്പിക്കുന്നത് രാജ്കുമാർ റാവു, ആദർശ് ഗൗരവ് എന്നിവരാണ്.
ഇപ്പോഴിതാ, ദുൽഖർ സൽമാന്റെ കാരക്ടർ പോസ്റ്റർ പുറത്തുവിട്ടിരിക്കുകയാണ് അണിയറപ്രവർത്തകർ. ദുൽഖർ സൽമാൻ തന്റെ ഔദ്യോഗിക ഇൻസ്റ്റാഗ്രാം ഹാൻഡിൽ വഴിയാണ് ഫസ്റ്റ് ലുക്ക് ക്യാരക്ടർ പോസ്റ്റർ പങ്കുവെച്ചത്. ‘നിങ്ങളുടെ സീറ്റ് ബെൽറ്റ് ധരിച്ച് എന്നോടൊപ്പം 90-കളിലേക്കുള്ള ഒരു യാത്രയ്ക്ക് തയ്യാറാകൂ. ഗൺസ് & ഗുലാബ്‌സിൽ നിന്നുള്ള എന്റെ ഫസ്റ്റ് ലുക്ക് ഇതാ, എന്റെ ആദ്യ വെബ് സീരീസും ‘രാജ് & ഡികെ’ എന്ന അത്ഭുത ജോഡിയുമായുള്ള എന്റെ ആദ്യ സഹകരണവും അവതരിപ്പിക്കുന്നു. രാജ്കുമാർ റാവു, ഗൗരവ് ആദർശ്, ഭാനു, ഗുൽഷൻ കൂടാതെ ഞങ്ങളുടെ മറ്റ് കഴിവുറ്റ സഹതാരങ്ങളും ഈ ത്രില്ലിംഗ് റൈഡിനായി എന്നോടൊപ്പം ചേരും’.- ദുൽഖർ കുറിക്കുന്നു.
റിപ്പോർട്ടുകൾ പ്രകാരം, ‘ഗൺസ് & ഗുലാബ്സ്’ 90-കളുടെ പശ്ചാത്തലത്തിലാണ് ഒരുക്കിയിരിക്കുന്നത്. കുറ്റകൃത്യത്തെയും പ്രണയത്തെയും ചുറ്റിപ്പറ്റിയാണെന്ന് പറയപ്പെടുന്നു. സീരീസ് ഉടൻ നെറ്റ്ഫ്ലിക്സ് പ്ലാറ്റ്‌ഫോം വഴി സ്ട്രീം ചെയ്യും. അതേസമയം, ദുൽഖർ സൽമാൻ നായകനായി അടുത്തിടെ പുറത്തിറങ്ങിയ ‘സല്യൂട്ട്’ പ്രേക്ഷകരിൽ നിന്ന് മികച്ച പ്രതികരണമാണ് നേടുന്നത്. റോഷൻ ആൻഡ്രൂസ് സംവിധാനം ചെയ്ത ചിത്രത്തിൽ അരവിന്ദ് കരുണാകരൻ എന്ന പോലീസ് കഥാപാത്രത്തെയാണ് ദുൽഖർ അവതരിപ്പിച്ചത്. ദുൽഖർ സൽമാന്റെ 2022-ലെ ചിത്രങ്ങളുടെ ലിസ്റ്റിൽ ‘കിംഗ് ഓഫ് കോത’, ‘ഓതിരം കടകം’, ‘ചുപ്പ്’, ‘വാൻ’ തുടങ്ങിയ നിരവധി പ്രോജക്ടുകളുണ്ട്.
Story highlights- Dulquer Salmaan’s first web series ‘Guns & Gulaabs’
