‘പോയകാലം തന്ന കൗതുകങ്ങൾ..’- ‘ലളിതം സുന്ദരം’ സിനിമയിൽ വിനീത് ശ്രീനിവാസൻ ആലപിച്ച ഗാനം പ്രേക്ഷകരിലേക്ക്
മലയാളികളുടെ ഇഷ്ടം കവർന്ന കഥാപാത്രങ്ങളിലൂടെ ജനഹൃദയങ്ങളിൽ കുടിയേറിയ താരമാണ് മഞ്ജു വാര്യർ. മലയാള സിനിമയിലെ ലേഡി സൂപ്പർസ്റ്റാർ എന്ന് ആരാധകർ സ്നേഹത്തോടെ അഭിസംബോധന ചെയ്യുന്ന മഞ്ജു വാര്യർ നായികയാകുന്ന പുതിയ ചിത്രമാണ് ലളിതം സുന്ദരം. മഞ്ജു വാര്യരുടെ സഹോദരൻ മധു വാര്യരാണ് ചിത്രം സംവിധാനം ചെയ്യുന്നത്. മധു വാര്യർ ആദ്യമായി സംവിധാനം ചെയ്യുന്ന ചിത്രം കൂടിയാണിത്. ഇപ്പോഴിതാ, ചിത്രത്തിലെ മനോഹരമായൊരു ഗാനം പ്രേക്ഷകരിലേക്ക് എത്തിയിരിക്കുകയാണ്.
വിനീത് ശ്രീനിവാസൻ ആലപിച്ച ‘പോയകാലം’ എന്നുതുടങ്ങുന്ന ഗാനത്തിന്റെ ലിറിക്കൽ വിഡിയോയാണ് പുറത്തുവിട്ടിരിക്കുന്നത്. ഒരു രസകരമായ കുടുംബ ചിത്രമായി ഒരുങ്ങുന്ന ലളിതം സുന്ദരം നിർമിക്കുന്നത് മഞ്ജു വാര്യർ ആണ്. മഞ്ജു വാര്യർ പ്രൊഡക്ഷൻസും സെഞ്ചുറിയും ചേർന്നാണ് നിർമാണം.
നീണ്ട ഇടവേളയ്ക്ക് ശേഷം മഞ്ജു വാര്യരും ബിജു മേനോനും ഒന്നിച്ച് അഭിനയിക്കുന്ന ചിത്രം കൂടിയാണ് ‘ലളിതം സുന്ദരം’. ‘ഇന്നലെ’, ‘പത്രം’, ‘കൃഷ്ണഗുഡിയിൽ ഒരു പ്രണയകാലത്ത്’, ‘പ്രണയ വർണങ്ങൾ’ തുടങ്ങി ഒട്ടേറെ ചിത്രങ്ങളിൽ മഞ്ജുവും ബിജു മേനോനും ഒന്നിച്ചഭിനയിച്ചിട്ടുണ്ട്. ഇപ്പോഴിതാ, ചിത്രം റിലീസിന് തയ്യാറെടുക്കുകയാണ്. ഒടിടി റിലീസായാണ് ലളിതം സുന്ദരം പ്രേക്ഷകരിലേക്ക് എത്തുന്നത്. ഡിസ്നി ഹോട്സ്റ്റാറിലൂടെയാണ് ചിത്രത്തിന്റെ റിലീസ്.
Read Also: പ്രണയം പങ്കുവെച്ച് പ്രഭാസും പൂജയും; ശ്രദ്ധനേടി ‘രാധേ ശ്യാം’ ഗാനം
ഒരു റൊമാന്റിക് കോമഡി ചിത്രം കൂടിയാണ് ഇത്. ചിത്രത്തിന്റെ ഷൂട്ടിംഗ് പൂർത്തിയാകാൻ ഏകദേശം ഒരു വർഷമെടുത്തു. കാരണം കൊവിഡ് പ്രതിസന്ധി ചിത്രത്തിന്റെ ഷൂട്ടിംഗിനെ പ്രതികൂലമായി ബാധിക്കുകയായിരുന്നു. പ്രമോദ് മോഹന്‍ ആണ് ചിത്രത്തിന്റെ രചന നിര്‍വഹിച്ചിരിക്കുന്നത്. ബിജു മേനോന്‍ നായകനായ ‘ഒരായിരം കിനാക്കള്‍’ എന്ന ചിത്രത്തിന്റെ സംവിധായകനാണ് പ്രമോദ് മോഹന്‍.
Story highlights- poyakaalam song from lalitham sundaram
