വീണ്ടും സീതയും ഇന്ദ്രനും അവരുടെ പ്രണയവും പൂവിടുമ്പോൾ- ‘സീതപ്പെണ്ണ്’ മാർച്ച് 28 മുതൽ ഫ്‌ളവേഴ്‌സ് ടിവിയിൽ
ഫ്‌ളവേഴ്‌സ് ടിവിയിൽ ഏറ്റവും ജനപ്രിയതയോടെ മുന്നേറിയ പരമ്പരകളിൽ ഒന്നാണ് സീത. സ്വാസികയും ഷാനവാസും പ്രധാന വേഷങ്ങളിൽ എത്തിയ സീത ഉയർത്തിയ തരംഗങ്ങൾ ചെറുതല്ല. പരമ്പര അവസാനിച്ച് രണ്ടുവർഷം പിന്നിടുമ്പോഴും സീതേന്ദ്രിയത്തിന് ആരാധകർ ഏറെയാണ്. സീതയുടെയും ഇന്ദ്രന്റെയും അവസാനിക്കാത്ത പ്രണയകഥയ്ക്കായി കാത്തിരുന്നവർ അനേകമാണ്. ഫ്‌ളവേഴ്‌സ് ടിവിയുടെ ഔദ്യോഗിക ഫേസ്ബുക്ക് പേജിലും യുട്യൂബ് ചാനലിലുമെല്ലാം ആളുകൾ സീതയ്ക്കായി കാത്തിരിക്കുന്ന സൂചനകൾ നൽകിയിരുന്നു.
ഇപ്പോഴിതാ, ആ കാത്തിരിപ്പിന് അവസാനമാകുകയാണ്. നീണ്ട ഇടവേളയ്ക്ക് ഒടുവിൽ സീതയും ഇന്ദ്രനും പ്രേക്ഷകർക്ക് മുന്നിലേക്ക് അവരുടെ പ്രണയകഥയുടെ പുതിയ അനുഭവങ്ങളുമായി എത്തുകയാണ്. സീതപ്പെണ്ണ് എന്ന പരമ്പര മാർച്ച് 28 മുതൽ പ്രേക്ഷകരിലേക്ക് എത്തുകയാണ്. സിനിമയിലെ വലിയ വിജയങ്ങൾക്കിടയിലും പ്രേക്ഷകരുടെ മനസ്സിൽ ഇടംനൽകിയ കഥാപാത്രമായി സ്വാസിക വീണ്ടും മിനിസ്ക്രീനിലേക്ക് എത്തുമ്പോൾ കാഴ്ചക്കാർക്കും ആവേശമാണ്.
സീതപ്പെണ്ണ് എന്ന പേരിലാണ് വീണ്ടും ഇരുവരും ഫ്‌ളവേഴ്‌സ് ടിവി യിലൂടെ പ്രേക്ഷകരിലേക്ക് എത്തുന്നത്. മാർച്ച് 28നാണ് സീതപ്പെണ്ണ് സംപ്രേഷണം ആരംഭിക്കുന്നത്. തിങ്കൾ മുതൽ ശനിവരെ രാത്രി 7.30നാണ് പരമ്പര സംപ്രേഷണം ചെയ്യുന്നത്. സീതപ്പെണ്ണിന്റെ പ്രൊമോ എത്തിയതോടെ പ്രേക്ഷകരും ആവേശത്തിലാണ്. അതേസമയം, സ്വാസികയ്ക്ക് ഏറ്റവും അംഗീകാരം നേടിക്കൊടുത്തത് സീതയെന്ന സീരിയൽ ആയിരുന്നു. പത്തുവർഷമായി വെള്ളിത്തിരയിൽ ഉണ്ടായിരുന്നിട്ടും സീതയാണ് ഏറ്റവും ജനപ്രിയത നേടിക്കൊടുത്തത്.
Story highlights- ‘Seetappennu’ will be aired on Flowers TV from March 28
