തിരഞ്ഞെടുക്കാൻ അവസരം കിട്ടിയാൽ ഈ ബാറ്റിംഗ് പൊസിഷനിൽ കളിക്കും; ഇഷ്ടപെട്ട ബാറ്റിംഗ് പൊസിഷൻ വ്യക്തമാക്കി സൂപ്പർതാരം ശ്രേയസ് അയ്യർ
ഇന്ത്യ- ശ്രീലങ്ക ടി 20 പരമ്പരയിലെ മൂന്നാം മത്സരത്തിലും തകർപ്പൻ വിജയം നേടി പരമ്പര തൂത്തുവാരിയിരിക്കുകയാണ് ഇന്ത്യൻ ടീം. തുടര്‍ച്ചയായ മൂന്നാം മത്സരത്തിലും അര്‍ധ സെഞ്ചുറി നേടിയ ശ്രേയസ് അയ്യറുടെ പ്രകടനമാണ് ഇന്ത്യക്ക് തകര്‍പ്പന്‍ വിജയം സമ്മാനിച്ചത്.
പരമ്പരയിലെ ഇന്ത്യൻ ടീമിൽ മുൻ ക്യാപ്റ്റൻ വിരാട് കോഹ്ലിയെ പരിഗണിച്ചിരുന്നില്ല. താരത്തിന് വിശ്രമം അനുവദിക്കുന്നതിന്റെ ഭാഗമായാണ് ടീമിൽ നിന്ന് ഒഴിവാക്കിയത്. പകരം മൂന്നാം നമ്പറിലേക്ക് പരിഗണിച്ചത് ശ്രേയസ് അയ്യരെയായിരുന്നു. പരമ്പരയിലെ മൂന്ന് മത്സരത്തിലും അർധ സെഞ്ചുറി നേടി മൂന്ന് തവണയും നോട്ടൗട്ടായി ശ്രേയസ് ഉജ്ജ്വലമായി ബാറ്റ് വീശി അവസരം ശരിക്കും മുതലെടുക്കുകയും ചെയ്തു. ഇപ്പോഴിതാ തനിക്ക് ഇഷ്ടപ്പെട്ട ബാറ്റിങ് പൊസിഷനെക്കുറിച്ച് പറഞ്ഞിരിക്കുകയാണ് ശ്രേയസ്.
പ്രതിഭാ സമ്പന്നമായ ഇന്ത്യൻ ടീമിൽ സ്ഥാനമുറപ്പിക്കുക എന്നത് വളരെ ബുദ്ധിമുട്ടുള്ള കാര്യം തന്നെയാണെന്നാണ് ശ്രേയസ് അയ്യർ പറയുന്നത്. ‘നിലവിലെ ഇന്ത്യൻ ടീമിൽ സ്ഥാനം ഉറപ്പാക്കാൻ കടുത്ത മത്സരം തന്നെ നടക്കുന്നുണ്ട്. അതിനാൽ തന്നെ കിട്ടുന്ന അവസരങ്ങൾ സമർഥമായി ഉപയോഗിക്കുകയും ആസ്വദിച്ച് കളിക്കലുമാണ് ലക്ഷ്യമിടുന്നത്. എനിക്ക് മത്സരങ്ങൾ ഫിനിഷ് ചെയ്യാൻ ഇഷ്ടമാണ്. പിച്ചിലേക്ക് പോകുമ്പോഴെല്ലാം അതെന്റെ ഉള്ളിലുണ്ടാകും. അതിനാൽ തന്നെ ഏത് പൊസിഷനിൽ ബാറ്റ് ചെയ്യണമെന്ന ഒരു തെരഞ്ഞെടുപ്പ് വന്നാൽ തീർച്ചയായും ഞാൻ മൂന്നാം സ്ഥാനമായിരിക്കും പറയുക. ഈ ഫോർമാറ്റിൽ, നിങ്ങളുടെ ഇന്നിങ്സ് ഏറ്റവും വേഗത്തിലാക്കാൻ കഴിയുന്ന ഒരേയൊരു സ്ഥലമാണ് ടോപ്പ് ത്രീ’- ശ്രേയസ് അയ്യർ പറഞ്ഞു.
Read More: മെക്സിക്കോയും കീഴടക്കി നദാലിന്റെ ജൈത്രയാത്ര തുടരുന്നു; 2022-ലെ മൂന്നാം കിരീടം നേടി സ്പാനിഷ് താരം
എന്നാലിപ്പോൾ ബാറ്റിംഗ് പൊസിഷനെ പറ്റി ചിന്തിക്കുന്നില്ലെന്നും ഓസ്‌ട്രേലിയയിൽ നടക്കാൻ പോകുന്ന ടി 20 ലോകകപ്പിനായി ഫോം നിലനിർത്തുകയാണ് മുന്നിലുള്ള ലക്ഷ്യമെന്നും ശ്രേയസ് അയ്യർ പറഞ്ഞു.
Story Highlights: Shreyas Iyer opens up about favourite batting position
