“ആകാശമാകെ..കണിമലർ”; പദ്മരാജൻ-മോഹൻലാൽ സിനിമയിലെ നിത്യഹരിത പ്രണയ ഗാനവുമായി വേദി കീഴടക്കി അക്ഷിത്ത്
പ്രണയവും വിരഹവും മനുഷ്യ മനസ്സുകളെ തൊട്ടുണർത്തിയ വികാരങ്ങളൊക്കെയും കഥകളിൽ ആവാഹിച്ച ഗന്ധർവനായിരുന്നു പദ്മരാജൻ. മലയാളികളുടെ എക്കാലത്തെയും പ്രിയപ്പെട്ട സംവിധായകരിലൊരാളായ പദ്‌മരാജൻറെ നിത്യഹരിത ക്ലാസിക് സിനിമകളിലൊന്നാണ് ‘നമുക്കു പാർക്കാൻ മുന്തിരിത്തോപ്പുകൾ.’ മലയാളത്തിന്റെ മഹാനടനായ മോഹൻലാൽ കേന്ദ്ര കഥാപാത്രത്തെ അവതരിപ്പിച്ച ചിത്രം ഒരിക്കലും മറക്കാൻ കഴിയാത്ത നിമിഷങ്ങളാണ് പ്രേക്ഷകർക്ക് സമ്മാനിച്ചത്.
ഇതിലെ ഗാനങ്ങൾ മൂളാത്ത മലയാളികളുണ്ടാവില്ല. അത്രക്ക് മനോഹരമായ ഗാനങ്ങളാണ് ചിത്രത്തിലുള്ളത്. അതിൽ തന്നെ ഏറ്റവും ജനപ്രീതി നേടിയ ഗാനമാണ് ‘ആകാശമാകെ കണിമലർ’ എന്ന് തുടങ്ങുന്ന ഗാനം. ജോൺസൻ മാഷ് സംഗീതം നൽകിയിരിക്കുന്ന ഗാനം ചിത്രത്തിൽ ആലപിച്ചിരിക്കുന്നത് ഗാനഗന്ധർവൻ യേശുദാസാണ്. ഇപ്പോൾ ടോപ് സിംഗർ വേദിയിൽ ഈ ഗാനവുമായെത്തി പ്രേക്ഷക ഹൃദയം കീഴടക്കിയിരിക്കുകയാണ് വേദിയുടെ പ്രിയപ്പെട്ട കൊച്ചു ഗായകൻ അക്ഷിത്ത്.
അതിമനോഹരമായാണ് അക്ഷിത്ത് ഈ ക്ലാസിക് പ്രണയ ഗാനം ആലപിച്ചിരിക്കുന്നത്. പ്രായത്തെ വെല്ലുന്ന ആലാപനമികവുകൊണ്ട് നേരത്തെയും ശ്രദ്ധിക്കപ്പെട്ട പ്രതിഭയാണ് അക്ഷിത്ത്. ആലാപനത്തിനൊപ്പം അക്ഷിത്ത് തിരഞ്ഞെടുക്കുന്ന പാട്ടുകളും പ്രേക്ഷകരെ ഈ കുഞ്ഞുഗായകന്റെ ആരാധകരാക്കി മാറ്റിയിട്ടുണ്ട്. കേൾക്കാൻ കൊതിക്കുന്ന പാട്ടുകളുമായി വന്ന് ടോപ് സിംഗർ വേദിയിൽ സംഗീത മഴ പെയ്യിക്കുന്ന ഈ കൊച്ചു ഗായകന്റെ പാട്ടുകൾക്കായി ആരാധകർ കാത്തിരിക്കാറുണ്ട്.
Read More: “വന്ദേ മുകുന്ദ ഹരേ..”; പ്രേക്ഷകരുടെ മനസ്സ് നിറച്ച് പാട്ട് വേദിയിൽ ഇന്നസെന്റിന്റെ ഗാനം
പ്രേക്ഷകർക്ക് മറക്കാനാവാത്ത അമൂല്യ നിമിഷങ്ങളാണ് പലപ്പോഴും ടോപ് സിംഗർ വേദിയിൽ അരങ്ങേറാറുള്ളത്. പലപ്പോഴും വിധികർത്താക്കളായ എം ജി ശ്രീകുമാറിന്റെയും എം ജയചന്ദ്രന്റെയും അനുരാധ ശ്രീറാമിന്റെയും പാട്ടുകൾ അവർക്ക് മുൻപിൽ തന്നെ ആലപിച്ച് വിധികർത്താക്കളെ അത്ഭുതപ്പെടുത്താറുണ്ട് ടോപ് സിംഗറിലെ കൊച്ചു പാട്ടുകാർ.
Story Highlights: Akshith singing aakashamake song
