മോഹൻലാലിൻറെ ഹിറ്റ് ഗാനവുമായി സംഗീത വേദിയിൽ അക്ഷിത്…
മലയാളികളുടെ പ്രിയപ്പെട്ട കഥാകാരനായിരുന്നു ലോഹിതദാസ്. പ്രേക്ഷകരുടെ ഉള്ളുലച്ച ഒട്ടേറെ കഥാപാത്രങ്ങളെ സൃഷ്‌ടിച്ച ലോഹിതദാസ് മലയാളത്തിന്റെ മഹാനടന്മാരായ മോഹൻലാലിനും മമ്മൂട്ടിക്കും നൽകിയത് പകരം വയ്ക്കാനില്ലാത്ത മികച്ച കഥാപാത്രങ്ങളെയാണ്. തിരക്കഥാകൃത്തായി സിനിമയിൽ തുടക്കം കുറിച്ച ലോഹിതദാസ് പിന്നീട് മലയാള സിനിമയിലെ ഏറ്റവും മികച്ച സംവിധായകരിലൊരാളായും മാറി.
ലോഹിതദാസ് എഴുതി സംവിധാനം ചെയ്‌ത മോഹൻലാൽ ചിത്രമാണ് ‘കന്മദം.’ 1998 ൽ റിലീസ് ചെയ്ത് തിയേറ്ററുകളിൽ മികച്ച വിജയം നേടിയ ചിത്രം നിരൂപക പ്രശംസയും ഏറ്റുവാങ്ങിയിരുന്നു. മോഹൻലാലിനൊപ്പം മഞ്ജു വാര്യരും ലാലും മികച്ച പ്രകടനം കാഴ്ചവെച്ച കന്മദത്തിലെ ഗാനങ്ങളും വലിയ ഹിറ്റുകളായിരുന്നു. അതിൽ തന്നെ “മഞ്ഞക്കിളിയുടെ മൂളിപ്പാട്ടുണ്ടോ” എന്ന് തുടങ്ങുന്ന ഗാനം മൂളാത്ത മലയാളികളുണ്ടാവില്ല. ഇപ്പോൾ ടോപ് സിംഗർ വേദിയിൽ ഈ ഗാനവുമായി എത്തിയിരിക്കുകയാണ് പ്രേക്ഷകരുടെ പ്രിയ ഗായകൻ അക്ഷിത്.
അതിമനോഹരമായാണ് അക്ഷിത് ഈ ഗാനം ആലപിച്ചിരിക്കുന്നത്. രവീന്ദ്രൻ മാഷ് സംഗീതം നൽകിയിരിക്കുന്ന ഗാനത്തിന്റെ വരികൾ എഴുതിയിരിക്കുന്നത് ഗിരീഷ് പുത്തഞ്ചേരിയാണ്. ഗാനഗന്ധർവ്വൻ യേശുദാസാണ് ചിത്രത്തിൽ ഈ ഗാനം ആലപിച്ചിരിക്കുന്നത്.
പ്രായത്തെ വെല്ലുന്ന ആലാപന മികവുകൊണ്ട് നേരത്തെയും ശ്രദ്ധിക്കപ്പെട്ട പ്രതിഭയാണ് അക്ഷിത്. ആലാപനത്തിനൊപ്പം അക്ഷിത് തിരഞ്ഞെടുക്കുന്ന പാട്ടുകളും പ്രേക്ഷകരെ ഈ കുഞ്ഞുഗായകന്റെ ആരാധകരാക്കി മാറ്റിയിട്ടുണ്ട്. കേൾക്കാൻ കൊതിക്കുന്ന പാട്ടുകളുമായി വന്ന് ടോപ് സിംഗർ വേദിയിൽ സംഗീത മഴ പെയ്യിക്കുന്ന ഈ കൊച്ചു ഗായകന്റെ പാട്ടുകൾക്കായി ആരാധകർ കാത്തിരിക്കാറുണ്ട്.
Read More: അമേരിക്കൻ പോലീസിനോട് താൻ മമ്മൂട്ടിയാണെന്ന് പറഞ്ഞപ്പോൾ നടന്ന രസകരമായ അനുഭവം ഓർത്തെടുത്ത് കൊല്ലം തുളസി
പ്രായഭേദമന്യേ വലിയ പ്രേക്ഷകസമൂഹമാണ് ടോപ് സിംഗറിന്റെ ഓരോ എപ്പിസോഡിനായും കാത്തിരിക്കുന്നത്. എം ജയചന്ദ്രൻ, എം ജി ശ്രീകുമാർ, അനുരാധ ശ്രീറാം എന്നിവരാണ് പാട്ടുവേദിയിലെ വിധികർത്താക്കൾ.
Story Highlights: Akshith sings a beautiful mohanlal song
