കെജിഎഫ് നിർമാതാക്കൾ പുതിയ സിനിമ പ്രഖ്യാപിച്ചു; ചിത്രം സംവിധാനം ചെയ്യുന്നത് സൂര്യ ചിത്രത്തിന്റെ സംവിധായിക സുധ കൊങ്കര
തിയേറ്ററിൽ പ്രേക്ഷകരെ ആവേശത്തിന്റെ കൊടുമുടിയിലെത്തിച്ചാണ് ‘കെജിഎഫ് 2’ പ്രദർശനം തുടരുന്നത്. എല്ലാ ഭാഷകളിലും എക്കാലത്തെയും മികച്ച ചിത്രമായി മാറിക്കൊണ്ടിരിക്കുകയാണ് ചിത്രത്തിന്റെ വിവിധ ഭാഷാപതിപ്പുകൾ.
കെജിഎഫ് 2 വമ്പൻ വിജയമായി മാറിക്കൊണ്ടിരിക്കുമ്പോൾ തങ്ങളുടെ അടുത്ത ചിത്രത്തിന്റെ വിവരങ്ങൾ പുറത്തു വിട്ടിരിക്കുകയാണ് നിർമാതാക്കളായ ഹൊംബാളെ ഫിലിംസ്. സൂരറൈ പോട്ര്, ഇരുധി സുട്രു തുടങ്ങിയ സൂപ്പർഹിറ്റ് തമിഴ് ചിത്രങ്ങളിലൂടെ പ്രശസ്തയായ സുധ കൊങ്കരയാണ് ഹൊംബാളെ ഫിലിംസിന്റെ അടുത്ത ചിത്രം സംവിധാനം ചെയ്യുന്നത്. നടന്ന സംഭവങ്ങളെ ആസ്പദമാക്കിയാണ് ചിത്രം ഒരുങ്ങുന്നതെന്നാണ് ഹൊംബാളെ ഫിലിംസ് തങ്ങളുടെ സമൂഹമാധ്യമങ്ങളിലൂടെ പങ്കുവെച്ച പോസ്റ്റിൽ പറയുന്നത്. തങ്ങളുടെ മറ്റ് ചിത്രങ്ങളെ പോലെ ഈ ചിത്രവും ഇന്ത്യ മുഴുവൻ ശ്രദ്ധിക്കപ്പെടുമെന്നാണ് തങ്ങളുടെ പ്രതീക്ഷയെന്നും നിർമാതാക്കൾ പ്രതീക്ഷ പ്രകടിപ്പിച്ചു.
കന്നഡ ചിത്രങ്ങൾ നിർമിച്ചു തുടങ്ങിയ ഹൊംബാളെ ഫിലിംസ് 2018 ൽ പുറത്തിറങ്ങിയ കെജിഎഫിന്റെ ആദ്യ ഭാഗത്തോട് കൂടിയാണ് ഇന്ത്യ മുഴുവൻ ശ്രദ്ധിക്കപ്പെട്ട് തുടങ്ങിയത്. കെജിഎഫ് 2 വിന്റെ അമ്പരപ്പിക്കുന്ന വിജയത്തോട് കൂടി നിർമാതാക്കൾ പ്രശസ്‌തിയുടെ കൊടുമുടിയിൽ എത്തി നിൽക്കുകയാണ്.
അതേ സമയം മാധവൻ കേന്ദ്ര കഥാപാത്രത്തെ അവതരിപ്പിച്ച ചിത്രമായ ഇരുധി സുട്രുവിന്റെ വിജയത്തോട് കൂടിയാണ് സുധ കൊങ്കര ശ്രദ്ധിക്കപ്പെടുന്നത്. പിന്നീട് സൂര്യ നായകനായ സൂരറൈ പോട്ര് എന്ന ചിത്രത്തിന്റെ വലിയ വിജയത്തോടെ ഇന്ത്യ മുഴുവൻ ശ്രദ്ധിക്കപ്പെട്ട സംവിധായിക കൂടിയാണ് സുധ കൊങ്കര. ഇപ്പോൾ ഹൊംബാളെ ഫിലിംസിനൊപ്പം സുധ കൊങ്കര ഒരുമിക്കുന്ന ചിത്രത്തിനായുള്ള ആവേശത്തോടെയുള്ള കാത്തിരിപ്പിലാണ് ആരാധകർ.
Story Highlights: Hombale films next film with sudha kongara
