അരങ്ങേറ്റത്തിലെ ആവേശം തുടരാൻ ലഖ്നൗ, പ്രതീക്ഷയോടെ ഹൈദരാബാദ്; ഐപിഎല്ലിൽ ഇന്ന് ലഖ്‌നൗവും ഹൈദരാബാദും നേർക്കുനേർ
ഐപിഎൽ അരങ്ങേറ്റം ആഘോഷമാക്കുകയാണ് ലഖ്നൗ സൂപ്പർ ജയൻറ്സ്. ആദ്യ മത്സരത്തിൽ ഗുജറാത്തിനോട് തോൽവി രുചിച്ചിരുന്നെങ്കിലും രണ്ടാമത്തെ മത്സരത്തിൽ മുൻ ചാമ്പ്യന്മാരായ ചെന്നൈ സൂപ്പർ കിങ്സിനെ തകർത്തെറിഞ്ഞാണ് ലഖ്നൗ ഇന്നത്തെ മത്സരത്തിനിറങ്ങുന്നത്. മറുവശത്ത് സീസണിലെ ആദ്യ ജയത്തിനായാണ് ഹൈദരാബാദ് ഇറങ്ങുന്നത്.
ഹൈദരാബാദിന് ഒരു ജയം അനിവാര്യമാണ്. കഴിഞ്ഞ സീസണിലെ അതേ പ്രകടനം തന്നെയാണ് ടീം ഇപ്പോഴും കാഴ്‌ച വച്ചുകൊണ്ടിരിക്കുന്നത്. നിക്കോളാസ് പുരാനും അബ്ദുൽ സമദും മികവിനൊത്ത് ഉയരാത്തതാണ് ഹൈദരാബാദ് നേരിടുന്ന ഏറ്റവും വലിയ വെല്ലുവിളി. ടി നടരാജൻ, ഭുവനേശ്വർ കുമാർ, ഉമ്രാൻ മാലിക്ക് എന്നീ ബൗളർമാരുടെ മികവിൽ ടീമിനേറെ പ്രതീക്ഷകളുണ്ടെങ്കിലും നായകനായ കെയ്ന്‍ വില്യംസൺ, ഏയ്ഡന്‍ മർക്രാം, വാഷിംഗ്ടൺ സുന്ദർ എന്നിവരുടെ പ്രകടനം ഹൈദരാബാദിന് നിർണായകമാണ്.
അതേ സമയം ചെന്നൈ സൂപ്പർ കിങ്സിനെ കീഴടക്കിയതിന്റെ ആത്മവിശ്വാസത്തിൽ വരുന്ന ലഖ്നൗ ഹൈദരാബാദിന് വലിയ വെല്ലുവിളി തന്നെ ഉയർത്തും എന്ന കാര്യത്തിൽ തർക്കമില്ല. അവിശ്വസനീയമായ ഒരു വിജയം തന്നെയാണ് ലഖ്നൗ ചെന്നൈക്കെതിരെ നേടിയത്. 211 റൺസെന്ന കൂറ്റൻ വിജയ ലക്ഷ്യം മുന്നിൽ കണ്ടിറങ്ങിയ ലഖ്നൗ ഒരു ഘട്ടത്തിൽ കളി പൂർണമായും കൈവിട്ടു എന്ന് കരുതിയതാണ്. എന്നാൽ അവിടുന്ന് ടീം നടത്തിയത് അതിഗംഭീരം എന്ന് വിശേഷിപ്പിക്കാവുന്ന ഒരു തിരിച്ചു വരവാണ്.
അവസാന നാലോവറില്‍ 56 റണ്‍സായിരുന്നു ലഖ്നൗവിന് ജയിക്കാൻ വേണ്ടിയിരുന്നത്. പതിനേഴാം ഓവറില്‍ 9 റണ്‍സടിച്ച ലഖ്നൗ ഡ്വയിന്‍ ബ്രാവോയുടെ പതിനെട്ടാം ഓവറില്‍ 12 റണ്‍സടിച്ചു. എന്നാല്‍ ശിവം ദുബെ എറിഞ്ഞ പത്തൊമ്പതാം ഓവറാണ് കളിയുടെ ഗതി മാറ്റിയത്. ആ ഓവറിൽ 25 റണ്‍സടിച്ച് ലഖ്നൗ വിജയത്തിന് അടുത്തെത്തി. അവസാന ഓവറിലെ മൂന്നാം പന്ത് സിക്സിന് പറത്തിയാണ് യുവതാരം ആയുഷ് ബദോനി ലഖ്നൗവിന് വിജയം നേടിക്കൊടുത്തത്. 3 പന്ത് ബാക്കി നിൽക്കെ 6 വിക്കറ്റിനായിരുന്നു ലഖ്‌നൗവിന്റെ വിജയം.
Read More: ‘ഹയ്യ ഹയ്യ..’; ആവേശമാവാൻ ഖത്തർ ലോകകപ്പ് ഗാനമെത്തി; ഒരുമിച്ച് നിൽക്കണം എന്ന് സന്ദേശം
മുംബൈയിൽ വൈകിട്ട് 7.30 ക്കാണ് ഇരു ടീമുകളും ഏറ്റുമുട്ടുന്നത്.
Story Highlights: Lukhnow vs hyderabad ipl match
