‘കേരളത്തിലെ പിള്ളേർ ആറാടുകയാണ്’; വൈറലായി മുംബൈ ഇന്ത്യൻസ് ഫേസ്ബുക്കിൽ പങ്കുവെച്ച സഞ്ജുവിന്റേയും ‘തമ്പി അളിയന്റെയും’ ചിത്രങ്ങൾ
മലയാളി താരങ്ങളാൽ സമ്പന്നമാണ് ഇത്തവണത്തെ ഐപിഎൽ. അത് കൊണ്ട് തന്നെ മറ്റേതൊരു സീസണെക്കാളും മലയാളികൾക്ക് പ്രിയപ്പെട്ടതാണ് ഇത്തവണത്തെ സീസൺ. കേരളത്തിന്റെ സ്വന്തം സഞ്ജു സാംസൺ രാജസ്ഥാന്റെ നായകനായി തകർത്താടുകയാണ് ഈ ഐപിഎല്ലിൽ. സഞ്ജുവിന് കൂട്ടായി മറ്റൊരു മലയാളി താരം ദേവ്ദത്ത് പടിക്കലും രാജസ്ഥാനിൽ കളിക്കുന്നുണ്ട്. ബൗളിങ്ങിൽ മികവ് കാണിച്ചിട്ടുള്ള ബേസിൽ തമ്പിയാണ് ഐപിഎല്ലിൽ കളിക്കുന്ന മറ്റൊരു മലയാളി താരം.
നാളെ നടക്കുന്ന മത്സരത്തിൽ രാജസ്ഥാൻ മുംബൈയെ നേരിടാനൊരുങ്ങുമ്പോൾ അത് രണ്ട് മലയാളികൾ തമ്മിലുള്ള വാശിയേറിയ ഏറ്റുമുട്ടലുകൂടിയായി മാറുമെന്നാണ് ഇപ്പോൾ ആരാധകർ പ്രതീക്ഷിക്കുന്നത്. സഞ്ജു സാംസൺ ബാറ്റിങ്ങിൽ മികച്ച ഫോം നിലനിർത്തുമ്പോൾ മുംബൈക്ക് വേണ്ടി ബോള് കൊണ്ട് ബേസിൽ തമ്പി തിളങ്ങുമെന്നാണ് ആരാധകർ പ്രതീക്ഷിക്കുന്നത്.
ഈ അവസരത്തിലാണ് മുംബൈ ഇന്ത്യൻസ് തങ്ങളുടെ ഫേസ്ബുക്കിൽ പങ്കുവെച്ച ചിത്രം വൈറലാവുന്നത്. ടീം പങ്കുവെച്ച സഞ്ജുവും ബേസിലും ഒരുമിച്ച് നിൽക്കുന്ന ഒരു ചിത്രമാണ് ആരാധകർ ഇപ്പോൾ ഏറ്റെടുത്തിരിക്കുന്നത്. ഇതോടൊപ്പം തന്നെ ചിത്രത്തിന് നൽകിയ അടിക്കുറിപ്പാണ് കൗതുകമാവുന്നത്. ‘കേരളത്തിലെ പിള്ളേർ ആറാടുകയാണ്’ എന്നാണ് മുംബൈ ചിത്രത്തിന് നൽകിയ അടിക്കുറിപ്പ്. കേരളത്തിൽ നിന്നുള്ള ഇവർ തമ്മിലുള്ള പോരാട്ടം കാണാൻ കാത്തിരിക്കുകയാണെന്നും മുംബൈ കുറിപ്പിൽ പറയുന്നു.
നേരത്തെ ബേസിലിനൊപ്പമുള്ള ചിത്രം സഞ്ജുവും തന്റെ സമൂഹമാധ്യമങ്ങളിൽ പങ്കുവെച്ചിരുന്നു. ബേസിലിനെ ‘തമ്പി അളിയൻ’ എന്ന് വിളിച്ചാണ് സഞ്ജു ചിത്രം പങ്കുവെച്ചത്.
നാളെ വൈകിട്ട് 3.30 നാണ് രാജസ്ഥാനും മുംബൈയും തമ്മിൽ ഏറ്റ് മുട്ടുന്നത്. ആദ്യ മത്സരത്തിൽ ഡൽഹിയോട് പരാജയപ്പെട്ട മുംബൈ ജയത്തിനായി തന്നെയാണ് ഇന്നിറങ്ങുന്നത്. മറുവശത്തു ക്യാപ്റ്റൻ സഞ്ജു സാംസണിന്റെ മികവിൽ സൺറൈസേഴ്‌സ് ഹൈദരാബാദിനെ തകർത്തെറിഞ്ഞാണ് രാജസ്ഥാൻ വരുന്നത്.
Story Highlights: Mumbai Indians shares pic of sanju and basil
