“ഏഴര പൊന്നാന പുറത്തെഴുന്നള്ളും..”; ചൈതന്യം തുളുമ്പുന്ന ഗാനവുമായി ദേവനക്കുട്ടി, മിഴിയും മനസ്സും നിറഞ്ഞ് പാട്ടുവേദി
ഫ്‌ളവേഴ്‌സ് ടോപ് സിംഗറിലെ കൊച്ചു ഗായകരുടെ ആലാപനത്തിൽ വിധികർത്താക്കൾ മതിമറന്നുപോയ മനോഹരമായ ഒരുപാട് നിമിഷങ്ങൾ വേദിയിൽ അരങ്ങേറിയിട്ടുണ്ട്. ഇപ്പോൾ അത്തരത്തിലൊരു നിമിഷത്തിനാണ് വേദി വീണ്ടും സാക്ഷ്യം വഹിച്ചിരിക്കുന്നത്.
അതിമനോഹരമായ ഒരു പാട്ടിലൂടെ പാട്ടുവേദിയുടെ പ്രിയ ഗായിക ദേവനശ്രിയ വേദിയുടെയും പ്രേക്ഷകരുടെയും മനസ്സ് കവർന്നിരിക്കുകയാണ്. രണ്ടാം സീസണിലേക്ക് മത്സരാർത്ഥിയായി എത്തുംമുമ്പ് തന്നെ താരമായിരുന്ന ഗായികയാണ് ദേവനശ്രിയ. സമൂഹമാധ്യമങ്ങളിൽ ദേവനശ്രിയയുടെ ഒരു പ്രകടനം വളരെയധികം ശ്രദ്ധനേടിയതിന് പിന്നാലെയാണ് ഈ മിടുക്കി പാട്ടുവേദിയിൽ മാറ്റുരയ്ക്കാൻ എത്തിയത്. മികച്ച ആലാപന മികവ് കാഴ്ചവയ്ക്കാറുള്ള ദേവനക്കുട്ടി ഇപ്പോൾ മറ്റൊരു ഗാനത്തിലൂടെ വേദിയെ വിസ്മയിപ്പിച്ചിരിക്കുകയാണ്.
ഈശ്വര ചൈതന്യം നിറഞ്ഞു നിൽക്കുന്ന ഒരു ഗാനമാണ് “ഏഴര പൊന്നാന പുറത്തെഴുന്നള്ളും ഏറ്റൂമാനൂരപ്പാ..” എന്ന ചലച്ചിത്ര ഗാനം. അക്കരപ്പച്ച എന്ന മലയാള ചിത്രത്തിലെ ഗാനമാണിത്. 1972 ലാണ് ചിത്രം റിലീസ് ചെയ്യുന്നത്. ദേവരാജൻ മാസ്റ്റർ സംഗീതം നൽകിയ ഗാനത്തിന് വരികളെഴുതിയിരിക്കുന്നത് വയലാറാണ്. പി മാധുരി ചിത്രത്തിൽ ആലപിച്ച് അനശ്വരമാക്കിയ ഈ ഗാനം അതിമനോഹരമായി പാട്ടുവേദിയിൽ ആലപിച്ച് പ്രേക്ഷകരുടെയും വിധികർത്താക്കളുടെയും മിഴിയും മനസ്സും നിറച്ചിരിക്കുകയാണ് കുഞ്ഞു ഗായിക ദേവനക്കുട്ടി.
മലയാളികളുടെ ഇടയിൽ വലിയ ആരാധകവൃന്ദമാണ് ഫ്‌ളവേഴ്‌സ് ടോപ് സിംഗറിലെ കുരുന്നു ഗായകർക്കുള്ളത്. ചെറിയ പ്രായത്തിൽ തന്നെ ഈ കൊച്ചു ഗായകർ അനുഭവസ്ഥരായ ഗായകർ ആലപിക്കുന്നത് പോലെ പാട്ട് പാടി പ്രേക്ഷകരുടെയും വിധികർത്താക്കളുടെയും കൈയടി ഏറ്റുവാങ്ങുന്നത് വേദിയിലെ സ്ഥിരം കാഴ്‌ചയാണ്‌.
Story Highlights: Devanasriya impresses audience with a devotional song
