പ്രണയ നായകനായി ആന്റണി വർഗീസ്- ‘‘ഓ മേരി ലൈല’ ടീസർ
ലിജോ ജോസ് പെല്ലിശ്ശേരി സംവിധാനം ചെയ്ത ‘അങ്കമാലി ഡയറീസ്’ മലയാളസിനിമയിൽ ചലനം സൃഷ്‌ടിച്ച ചിത്രമായിരുന്നു. ഈ സിനിമയിലൂടെയാണ് വിൻസെന്റ് പെപ്പെ എന്ന കഥാപാത്രമായെത്തി ആന്റണി വർഗീസ് അഭിനയലോകത്ത് ചുവടുറപ്പിച്ചതും. ‘അങ്കമാലി ഡയറീസ്’ ആന്റണി വർഗീസിന്റെ കരിയറിൽ മികച്ച തുടക്കമാണ് നൽകിയത്. വാരിവലിച്ച് ചിത്രങ്ങൾ ചെയ്യുന്ന പതിവ് ആന്റണിക്ക് ഇല്ല. എന്നാൽ ആദ്യചിത്രം മുതൽ ഇങ്ങോട്ട് അടിപിടി ചിത്രങ്ങളാണ് നടൻ ചെയ്തത്.
ഇപ്പോഴിതാ, അതിൽ നിന്നും ഒരു മാറ്റം വന്നിരിക്കുകയാണ്. ഒരു റൊമാന്റിക് ചിത്രത്തിൽ വേഷമിടുകയാണ് താരം. ‘ഓ മേരി ലൈല’ എന്നാണ് ചിത്രത്തിന്റെ പേര്. സിനിമയുടെ ടീസർ എത്തി. പ്രണയവും സഹൃദവുമൊക്കെ ചേർത്തൊരു ചിത്രമാണ് ഇത് എന്ന സൂചനയാണ് ട്രെയ്‌ലർ നൽകുന്നത്. ആൻറണി വര്‍ഗീസിനെ നായകനാക്കി സഹപാഠിയായ അഭിഷേക് കെ എസ് സംവിധാനം ചെയ്യുന്ന ചിത്രമാണിത്.
സിനിമയില്‍ പുതുമുഖങ്ങളായ നന്ദന രാജനും സോനയും ശിവകാമിയുമാണ് നായികമാര്‍. ഒരു മുഴുനീള ക്യാമ്പസ് പശ്ചാത്തലത്തിലാണ് കഥ പറയുന്നത്. കോളേജ് വിദ്യാര്‍ത്ഥിയായിട്ടാണ് ആൻറണി വര്‍ഗീസ് ചിത്രത്തില്‍ എത്തുന്നത്. നവാഗതനായ അനുരാജ് ഒ.ബി ചിത്രത്തിന്റെ രചന നിർവഹിച്ചിരിക്കുന്നു.
എറണാകുളം മഹാരാജാസിൽ ഒരുമിച്ച് പഠിച്ചിരുന്ന ആൻറണിയും അഭിഷേകും ക്യാമ്പസ് കാലത്ത് തന്നെ ഷോർട് ഫിലിമുകൾ ചെയ്തിരുന്നു. മഹാരാജാസിൽ സുഹൃത്തുക്കൾക്കൊപ്പം ചെയ്തിരുന്ന ഷോർട് ഫിലിമുകളിലൂടെയാണ് ആൻറണി വർഗീസ് ‘അങ്കമാലി ഡയറീസിന്റെ’ ഓഡിഷനിലേക്ക് എത്തുന്നത്.
Story highlights- oh meri laila teaser
