കൈലാസ പർവ്വതം ഇന്ത്യയിൽ നിന്നും കാണാം; കാത്തിരിക്കാം, സെപ്റ്റംബറിനായി..
ഇന്ത്യൻ ഇതിഹാസങ്ങളിലും പുരാണങ്ങളിലും ഒഴിച്ചുകൂടാനാകാത്ത സാന്നിധ്യമാണ് കൈലാസ പർവ്വതത്തിനുള്ളത്.ഹൈന്ദവ ദൈവമായ ശിവന്റെ വാസസ്ഥലമെന്ന് വിശ്വസിക്കപ്പെടുന്ന കൈലാസ് പർവ്വതം ഈ വർഷം സെപ്റ്റംബർ മുതൽ ഇന്ത്യയിൽ നിന്നും കാണാൻ സാധിക്കും.
ഇങ്ങോട്ടേക്കുള്ള യാത്ര സുഗമമാക്കാനുള്ള നടപടികളും ആരംഭിച്ചുകഴിഞ്ഞു. ബോർഡർ റോഡ്‌സ് ഓർഗനൈസേഷൻ (ബിആർഒ) ഉത്തരാഖണ്ഡിലെ പിത്തോരഗഢ് ജില്ലയിലെ നാഭിദാംഗിലെ കെഎംവിഎൻ ഹട്ട്‌സ് മുതൽ ഇന്ത്യ-ചൈന അതിർത്തിയിലെ ലിപുലേഖ് ചുരം വരെയുള്ള റോഡ് വെട്ടിക്കുറയ്ക്കാനുള്ള പ്രവർത്തനങ്ങൾ ആരംഭിച്ചതായും ഇത് സെപ്റ്റംബറിൽ പൂർത്തിയാകുമെന്നും ഉദ്യോഗസ്ഥർ പറഞ്ഞതായി റിപ്പോർട്ടുകൾ സൂചിപ്പിക്കുന്നു.
റോഡ് പൂർത്തിയാകുന്നതോടെ വഴിയരികിൽ ‘കൈലാസ് വ്യൂ പോയിന്റ്’ ഒരുക്കും. അതേസമയം, കൊവിഡ് പകർച്ചവ്യാധിയെ തുടർന്ന് മാറ്റിവെച്ച ലിപുലേഖ് ചുരത്തിലൂടെയുള്ള കൈലാസ്-മാനസരോവർ യാത്ര പുനരാരംഭിച്ചിട്ടില്ല. കൈലാസ പർവതത്തിലേക്ക് പ്രവേശിക്കുന്നതിന് സന്ദർശകർക്ക് ഒരു ബദൽ പാത രൂപപ്പെടുത്തുന്നതിനുള്ള ഇന്ത്യൻ സർക്കാരിന്റെ ശ്രമങ്ങൾ ആരംഭിച്ചിട്ടുമുണ്ട്.
ഹിമാലയൻ പർവതനിരകളിലെ ടിബറ്റിന്റെ തെക്കുപടിഞ്ഞാറൻ കോണിൽ സ്ഥിതി ചെയ്യുന്ന ശ്രദ്ധേയമായ കൊടുമുടിയാണ് കൈലാസ് പർവ്വതം. 6638 മീറ്റർ (21778 അടി) ഉയരത്തിലുള്ള ഇത് ഹിമാലയത്തിലെ ഏറ്റവും ഉയരമുള്ള ഭാഗങ്ങളിൽ ഒന്നാണ്. കൂടാതെ ഏഷ്യയിലെ ഏറ്റവും നീളം കൂടിയ നദികളുടെ ഉറവിടമായും അറിയപ്പെടുന്നു. ടിബറ്റിൽ ഗാംഗ് ടൈസ് അല്ലെങ്കിൽ ഗാംഗ് റിൻപ്രോച്ചെ എന്നറിയപ്പെടുന്ന കൈലാസ പർവ്വതം വജ്രത്തിന്റെ ആകൃതിയിലുള്ള ഒരു പർവതമാണ്. ഇതിനു ചുറ്റുമുള്ള പ്രദേശം അതിമനോഹരമാണ്.
Read Also: ഭക്ഷണത്തോടുള്ള വിമുഖത മാറ്റാം; ആരോഗ്യമുള്ള കുഞ്ഞുങ്ങൾക്കായി ആരോഗ്യകരമായ ഡയറ്റ് ഇതാ..
കൈലാസ പർവ്വതം ഏറ്റവും പവിത്രമായ പർവതങ്ങളിലൊന്നായി വിശ്വാസങ്ങളുമായി ബന്ധപ്പെടുത്തി അറിയപ്പെടുന്നത്. കൂടാതെ ബുദ്ധമതക്കാർ, ജൈനർ, ഹൈന്ദവ, ടിബറ്റൻ മതമായ ബോൺ എന്നിങ്ങനെ നാല് വിശ്വാസങ്ങളുടെ ഒരു പ്രധാന തീർത്ഥാടനമായി ഇവിടം മാറിയിരിക്കുന്നു. എല്ലാ വർഷവും ലോകമെമ്പാടുമുള്ള ആയിരക്കണക്കിന് ആളുകൾ ഈ സ്ഥലത്തേക്ക് തീർത്ഥാടനം നടത്താറുണ്ട്.
Story highlights- Mount Kailash to become accessible from India September onwards
