ഹിറ്റ് മേക്കർ ജോഷിയും ഉണ്ണിമുകുന്ദനും ഒന്നിക്കുന്നു; ഒരുങ്ങുന്നത് ഹൈ-ഒക്ടേൻ ആക്ഷൻ ത്രില്ലർ.
പ്രശസ്ത സംവിധായകൻ ജോഷിയുടെ ജന്മദിനമായ ഇന്ന്(ജൂലായ് 18) ഇന്ത്യൻ ചലച്ചിത്രലോകത്തെ ആവേശഭരിതമാക്കി കൊണ്ട് പിറന്നാൾ സമ്മാനമായി പുതിയ സിനിമ. ഹിറ്റ് മേക്കറായ ജോഷി, പാൻ-ഇന്ത്യൻ ആക്ഷൻ സൂപ്പർസ്റ്റാർ ഉണ്ണി മുകുന്ദനുമായി ഒരു ഹൈ-ഒക്ടേൻ ആക്ഷൻ ചിത്രത്തിനായി ഒന്നിക്കുന്നു. പ്രേക്ഷകർ ഏറേ ആകാംക്ഷയോടെ കാത്തിരിക്കുന്ന ഇവരുടെ ആദ്യത്തെ ഈ കൂട്ടുകെട്ട് ഇന്ത്യൻ സിനിമയിൽ ഒരു വഴിത്തിരിവാകുമെന്നാണ് പ്രതീക്ഷിക്കുന്നത്.
വലിയ ബഡ്ജറ്റിൽ ഒരുങ്ങുന്ന ഈ ചിത്രം, ആക്ഷൻ സിനിമയുടെ നിലവാരം ഉയർത്തുന്നതായിരിക്കുമെന്നും ഉണ്ണി മുകുന്ദൻ ഇതുവരെ കാണാത്ത ഒരു ഗെറ്റപ്പിൽ എത്തുമെന്നും, അണിയറപ്രവർത്തകർ സൂചിപ്പിക്കുന്നു. ഉണ്ണി മുകുന്ദൻ ഫിലിംസിന്റെ ബാനറിൽ ഉണ്ണി മുകുന്ദൻ, ഐൻസ്റ്റിൻ മീഡിയയുടെ ബാനറിൽ ഐൻസ്റ്റിൻ സാക് പോൾ എന്നിവർ ചേർന്നാണ് ഈ ചിത്രം നിർമ്മിക്കുന്നത്. ‘പൊറിഞ്ചു മറിയം ജോസിന്’ ശേഷം അഭിലാഷ് എൻ ചന്ദ്രൻ തിരക്കഥ ഒരുക്കുന്ന ഈ ചിത്രത്തിന്റെ ചിത്രീകരണം അടുത്ത മാസം ആരംഭിക്കും.
പാൻ-ഇന്ത്യൻ ബ്ലോക്ക്ബസ്റ്ററായ ‘മാർക്കോ’യുടെ റെക്കോർഡ് വിജയത്തിന് ശേഷം ഉണ്ണി മുകുന്ദൻ അഭിനയിക്കുന്ന ആദ്യ ചിത്രമെന്ന പ്രത്യേകതയും ഇതിനുണ്ട്. കഴിഞ്ഞ ഒരു മാസമായി ഉണ്ണി മുകുന്ദൻ ഈ ചിത്രത്തിനു വേണ്ടി ദുബായിൽ ട്രെയ്നിങിലാണ്. ജോഷിയുടെ ഈ ജന്മദിനത്തിലെ അടിപൊളി പ്രഖ്യാപനത്തോടെ പ്രേക്ഷകർ ഏറേ ആവേശത്തിമിർപ്പിലാണ്.
Story highlights: Hitmaker Joshi & Unni Mukundan new action thriller movie announced.
