ബുക്ക് മൈ ഷോയിൽ റെക്കോർഡ് ട്രെൻഡിങ്ങുമായി ‘ഭ.ഭ. ബ’; ദിലീപ് ചിത്രത്തിൻ്റെ ആഗോള റിലീസ് ഡിസംബർ 18 ന്
ജനപ്രിയ നായകൻ ദിലീപിനെ നായകനാക്കി, ശ്രീ ഗോകുലം മൂവീസിൻ്റെ ബാനറിൽ ഗോകുലം ഗോപാലൻ നിർമ്മിക്കുന്ന ‘ഭ.ഭ.ബ’ യുടെ ഓൺലൈൻ ടിക്കറ്റ് ബുക്കിംഗ് ഇന്ന് രാവിലെ 10 മണിക്ക് ആരംഭിച്ചു. ബുക്കിംഗ് ആരംഭിച്ച നിമിഷം മുതൽ ബുക്ക് മൈ ഷോയിൽ തരംഗമായി മാറിയ ചിത്രം ഇപ്പൊൾ മണിക്കൂറിൽ 18000 ടിക്കറ്റുകൾ വരെ വിറ്റു പോകുന്ന വമ്പൻ ട്രെൻഡിങ് ആണ് കാണിക്കുന്നത്. എംപുരാൻ, തുടരും, ലോക എന്നിവക്ക് ശേഷം ഒരു മലയാള ചിത്രം ഒരു മണിക്കൂറിൽ നേടുന്ന ഏറ്റവും വലിയ ബുക്ക് മൈ ഷോ ട്രെൻഡിങ് നമ്പർ ആണ് ഈ ചിത്രം സ്വന്തമാക്കിയത്. ചിത്രം കേരളത്തിൽ റിലീസ് ചെയ്യുന്ന പകുതി കേന്ദ്രങ്ങളിൽ മാത്രമേ ബുക്കിംഗ് ഓപ്പൺ ആയിട്ടുള്ളൂ എന്ന വസ്തുത നിലനിൽക്കുമ്പോഴാണ് ഈ റെക്കോർഡ് ബുക്കിംഗ് ചിത്രത്തിന് ലഭിക്കുന്നത് എന്നതും ശ്രദ്ധേയമാണ്. നവാഗതനായ ധനഞ്ജയ് ശങ്കർ സംവിധാനം ചെയ്ത ചിത്രം 2025 ഡിസംബർ 18 നാണ് ആഗോള റിലീസായി എത്തുക. ദിലീപിനൊപ്പം വിനീത് ശ്രീനിവാസൻ, ധ്യാൻ ശ്രീനിവാസൻ എന്നിവരും നിർണ്ണായക വേഷങ്ങൾ ചെയ്യുന്ന ഈ തകർപ്പൻ മാസ് കോമഡി ആക്ഷൻ എന്റെർറ്റൈനെർ ചിത്രത്തിൽ, തീയേറ്ററുകളെ പൂരപ്പറമ്പാക്കുന്ന വമ്പൻ അതിഥി വേഷത്തിൽ മലയാളത്തിൻ്റെ മഹാനടൻ മോഹൻലാലും എത്തുന്നു. കോ പ്രൊഡ്യൂസേർസ്- ബൈജു ഗോപാലൻ, വി.സി. പ്രവീൺ, എക്സിക്യൂട്ടീവ് പ്രൊഡ്യൂസർ- കൃഷ്ണമൂർത്തി. ഡ്രീം ബിഗ് ഫിലിംസ് ആണ് ചിത്രത്തിന്റെ കേരളത്തിലെ ഡിസ്ട്രിബൂഷൻ പാർട്ണർ.
കേരളത്തിലെ 450 സ്ക്രീനുകളിൽ റിലീസ് പ്രതീക്ഷിക്കുന്ന ചിത്രം, ദിലീപിൻ്റെ കരിയറിലെ തന്നെ ഏറ്റവും വലിയ കേരള, ആഗോള ഓപ്പണിംഗ് നമ്പറുകളിലേക്കാണ് കുതിക്കുന്നത്. ബുക്ക് മൈ ഷോ, ടിക്കറ്റ് ന്യൂ, ഡിസ്ട്രിക്ട് ആപ്പ് എന്നീ ബുക്കിംഗ് പ്ലാറ്റ്ഫോമുകൾ വഴി ചിത്രത്തിൻ്റെ ടിക്കറ്റുകൾ ബുക്ക് ചെയ്യാവുന്നതാണ്.
അതിഥി താരമായി എത്തുന്ന മോഹൻലാലിൻ്റെ സാന്നിധ്യം ചിത്രത്തിന് നൽകുന്ന ഹൈപ്പും പ്രതീക്ഷയും പ്രേക്ഷക പിന്തുണയും വളരെ വലുതാണ്. മോഹൻലാൽ -ദിലീപ് ടീം നൃത്തം വെക്കുന്ന “അഴിഞ്ഞാട്ടം” എന്ന ഗാനം കഴിഞ്ഞ ദിവസം പുറത്ത് വന്നിരുന്നു. അക്ഷരാർത്ഥത്തിൽ ഒരു ആഘോഷം പ്രേക്ഷകർക്ക് സമ്മാനിക്കുന്ന ഈ ഗാനവും ഇപ്പൊൾ വലിയ ശ്രദ്ധ നേടുന്നുണ്ട്. ഇരുവരുടെയും തകർപ്പൻ നൃത്ത ചുവടുകൾ ആണ് ഈ ഗാനത്തിൻ്റെ ഹൈലൈറ്റ്.
Read also- ബിബിൻ ജോർജ്, ഷൈൻ ടോം ചാക്കോ, ചന്തുനാഥ് എന്നിവർ ഒന്നിക്കുന്ന ചിത്രം ‘ശുക്രൻ ‘ ഫസ്റ്റ് ലുക്ക് പോസ്റ്റർ പുറത്തിറങ്ങി
ചിത്രത്തിൻ്റെ ട്രെയ്ലർ ദിവസങ്ങൾക്ക് മുൻപ് പുറത്ത് വരികയും വമ്പൻ പ്രേക്ഷക പ്രതികരണം നേടുകയും ചെയ്തിരുന്നു. ആദ്യാവസാനം പ്രേക്ഷകർക്ക് ആഘോഷം സമ്മാനിക്കുന്ന രീതിയിൽ ആണ് ചിത്രം അവതരിപ്പിക്കുന്നത് എന്ന സൂചനയാണ് ട്രെയ്ലർ, ഗാനം എന്നിവ നൽകിയത്. ദിലീപ്, വിനീത് ശ്രീനിവാസൻ, ധ്യാൻ ശ്രീനിവാസൻ എന്നിവർക്കൊപ്പം മോഹൻലാലിൻറെ ഒരു മാസ്സ് അഴിഞ്ഞാട്ടവും പ്രേക്ഷകരെ കാത്തിരിക്കുന്നുണ്ട് എന്നാണ് ട്രെയ്ലർ, ഗാനം എന്നിവ കാണിച്ചു തന്നത്. സംഘട്ടനവും, ഹാസ്യവും പാട്ടും, നൃത്തവുമെല്ലാം കോർത്തിണക്കി പ്രേക്ഷകർക്ക് ഒരു ഗംഭീര തീയേറ്റർ അനുഭവം സമ്മാനിക്കാനുള്ള ഒരുക്കത്തിലാണ് ചിത്രത്തിൻ്റെ അണിയറ പ്രവർത്തകർ. ജനപ്രിയ നായകൻ ദിലീപിന്റെ ഒരു കംപ്ലീറ്റ് ഷോ വാഗ്ദാനം ചെയ്യുന്ന ചിത്രം, യുവ പ്രേക്ഷകർക്കും കുടുബ പ്രേക്ഷകർക്കും ക്രിസ്മസ് വെക്കേഷൻ അടിച്ചു പൊളിക്കാൻ സാധിക്കുന്ന സിനിമാനുഭവം സമ്മാനിക്കാനാണ് ഒരുങ്ങുന്നത്. “വേൾഡ് ഓഫ് മാഡ്നെസ്സ്” എന്ന ടാഗ് ലൈനോടെയാണ് ചിത്രം അവതരിപ്പിക്കുന്നത്.
ഫാഹിം സഫർ, നൂറിൻ ഷെരീഫ് എന്നിവർ ചേർന്നാണ് ചിത്രം രചിച്ചിരിക്കുന്നത്. സിദ്ധാർത്ഥ് ഭരതൻ, ബൈജു സന്തോഷ് , ബാലു വർഗീസ്, സലിം കുമാർ, അശോകൻ, ദേവൻ, ബിജു പപ്പൻ, ജി. സുരേഷ് കുമാർ, നോബി, വിജയ് മേനോൻ, റിയാസ് ഖാൻ, സെന്തിൽ കൃഷ്ണാ, റെഡിൻ കിംഗ്സിലി (തമിഴ്), ഷമീർ ഖാൻ (പ്രേമലു ഫെയിം) ഷിൻസ്, ശരണ്യ പൊൻ വണ്ണൻ, നൂറിൻ ഷെറീഫ്, ധനശ്രീ, ലങ്കാ ലഷ്മി, കോറിയോഗ്രാഫർ സാൻ്റി എന്നിവരും ചിത്രത്തിന്റെ താരനിരയിലുണ്ട്. അഡീഷണൽ തിരക്കഥയും സംഭാഷണവും- ധനഞ്ജയ് ശങ്കർ, ഛായാഗ്രഹണം – അർമോ, സംഗീതം – ഷാൻ റഹ്മാൻ, പശ്ചാത്തല സംഗീതം- ഗോപി സുന്ദർ, എഡിറ്റിംഗ് – രഞ്ജൻ ഏബ്രഹാം, കലാസംവിധാനം – നിമേഷ് താനൂർ, പ്രൊഡക്ഷൻ കൺട്രോളർ സുരേഷ് മിത്രക്കരി, ആക്ഷൻ- കലൈ കിങ്സൺ, സുപ്രീം സുന്ദർ, കോസ്റ്റ്യൂം ഡിസൈനർമാർ- ധന്യ ബാലകൃഷ്ണൻ, വെങ്കിട്ട് സുനിൽ (ദിലീപ്), മേക്കപ്പ്- റോണെക്സ് സേവ്യർ, നൃത്തസംവിധാനം- സാൻഡി, സൌണ്ട് ഡിസൈൻ- സിങ്ക് സിനിമ, സൌണ്ട് മിക്സിംഗ്- അജിത് എ ജോർജ്, ട്രെയിലർ കട്ട്- എജി, വരികൾ – കൈതപ്രം ദാമോദരൻ നമ്പൂതിരി, വിനായക് ശശികുമാർ, മനു മഞ്ജിത്ത്, ഫിനാൻസ് കൺട്രോളർ- ശ്രീജിത്ത് മണ്ണാർക്കാട്, ചീഫ് അസോസിയേറ്റ് ഡയറക്ടർ – അനിൽ എബ്രഹാം, വി. എഫ്. എക്സ്- ഐഡൻറ് ലാബ്സ്, ഡിഐ- കളർ പ്ലാനറ്റ് സ്റ്റുഡിയോസ്, കളറിസ്റ്റ്ഃ രമേഷ് സിപി, സ്റ്റിൽസ്- സെറീൻ ബാബു, പബ്ലിസിറ്റി ഡിസൈനുകൾ- യെല്ലോ ടൂത്ത്സ്, വിതരണ പങ്കാളി- ഡ്രീം ബിഗ് ഫിലിംസ്, ഓവർസീസ് വിതരണം- ഫാർസ് ഫിലിംസ്, സബ്ടൈറ്റിലുകൾ- ഫിൽ ഇൻ ദി ബ്ളാങ്ക്സ്, പ്രോജക്ട് മാനേജ്മെന്റ് പ്ലാറ്റ്ഫോം -ബിഹൈൻഡ് ദി സീൻ ആപ്പ്, പ്രമോഷൻസ്- ദി യൂനിയൻ, വിഷ്വൽ പ്രമോഷൻസ് – സ്നേക് പ്ലാന്റ് എൽഎൽപി, ആന്റി പൈറസി- ഒബ്സ്ക്യൂറ, പിആർഒ – വൈശാഖ് സി വടക്കേവീട്, ജിനു അനിൽകുമാർ.
Story highlights: ‘Bha Bha Ba’ online tickets are selling fast book now
