കുടുംബസ്നേഹം പറഞ്ഞ് ‘ഹാപ്പി സർദാർ’; ശ്രദ്ധനേടി ഗാനം
പ്രേക്ഷകർ അക്ഷമരായി കാത്തിരിക്കുന്ന കാളിദാസ് ജയറാം ചിത്രമാണ് ഹാപ്പി സർദാർ. കാളിദാസിനെ നായകനാക്കി ദമ്പതിമാരായ സുദീപും ഗീതികയും ചേർന്നാണ് ചിത്രം സംവിധാനം ചെയ്യുന്നത്. കോമഡി എന്‍റര്‍ടെയ്നറായ ചിത്രം ഹസീബ് ഹനീഫാണ് നിർമ്മിക്കുന്നത്. ഇപ്പോഴിതാ ചിത്രത്തിലെ ഒരു കല്യാണ പാട്ടാണ് ഏറെ ശ്രദ്ധനേടുന്നത്.
‘ഷാദി മേൻ ആനാ…’ എന്ന് തുടങ്ങുന്ന ഗാനമാണ് റിലീസ് ചെയ്തിരിക്കുന്നത്. മനോഹരമായ കുടുംബത്തിന്റെ സ്നേഹം പറയുന്ന ഗാനത്തിന്റെ വരികൾ തയാറാക്കിയിരിക്കുന്നത് സന്തോഷ് വർമ്മയാണ്. ഗോപി സുന്ദർ ചിട്ടപ്പെടുത്തിയ ഗാനം ആലപിച്ചിരിക്കുന്നത് സിയ ഉൽ ഹാഖ്‌, അഭയ ഹിരണ്മയി, ദിവ്യ എസ് മേനോൻ, ശ്വേതാ അശോക് എന്നിവർ ചേർന്നാണ്.
ക്‌നാനായ പെൺകുട്ടിയും സർദാർ യുവാവും തമ്മിലുള്ള പ്രണയമാണ് ചിത്രത്തിന്റെ ഇതിവൃത്തം. ക്‌നാനായ പെൺകുട്ടിയായി ചിത്രത്തിൽ വേഷമിടുന്നത് മെറിൻ ഫിലിപ്പാണ്. ‘പൂമരം’ എന്ന ചിത്രത്തിലും മെറിൻ കാളിദാസിനൊപ്പം അഭിനയിച്ചിരുന്നു. ശ്രീനാഥ്‌ ഭാസി, സുരജ് വെഞ്ഞാറമൂട്, ഹരീഷ് കണാരൻ, പിഷാരടി, ബാലു വർഗീസ്, ധർമ്മജൻ, പ്രവീണ, ശാന്തി കൃഷ്ണ, സിദ്ധിഖ്, ജാവേദ് ജഫ്രി എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നുണ്ട്.
