‘ഏതൊരു നടനും കൊതിക്കുന്ന മരണമാണ് ഇക്കയുടേത്’; ഹൃദയം തൊടുന്ന കുറിപ്പുമായി മഞ്ജു വാര്യര്
മരണപ്പെട്ട നടനും സംവിധാന സഹായിയുമായ കുഞ്ഞിമുഹമ്മദിനെ അനുസ്മരിച്ച് മലയാളികളുടെ പ്രിയതാരം മഞ്ജു വാര്യര്. ഏവരുടെയും ഹൃദയം കവരും വിധമുള്ള ഒരു കുറിപ്പാണ് കുഞ്ഞിമുഹമ്മദിനെക്കുറിച്ച് മഞ്ജു വാര്യര് സാമൂഹ്യമാധ്യമങ്ങളില് പങ്കുവെച്ചത്. ചായം തേച്ചുനില്ക്കെ യാത്ര പറയുന്നത് ഏതൊരു നടന്റെയും ഭാഗ്യമാണെന്നും മഞ്ചുവാര്യര് കുറിച്ചു.
സത്യന് അന്തിക്കാട് സംവിധാനം ചെയ്യുന്ന ‘ഞാന് പ്രകാശന്’ എന്ന ചിത്രത്തിന്റെ ചിത്രീകരണവേളയിലായിരുന്നു കുഞ്ഞിമുഹമ്മദിന്റെ മരണം. നെഞ്ചുവേദനയെത്തുടര്ന്ന് കുഴഞ്ഞുവീഴുകയായിരുന്നു അദ്ദേഹം.
മഞ്ജു വാര്യരുടെ കുറിപ്പിന്റെ പൂര്ണ്ണരൂപം
‘ഏതൊരു അഭിനേതാവും കൊതിക്കുന്ന മരണമാണ് കുഞ്ഞുമുഹമ്മദിക്കയുടേത്. ചായം തേച്ചു നില്ക്കെ യാത്ര പറയുക. ഗുരു ഗോപിനാഥിനും, മടവൂരാശാനും, ആലുംമൂടന് ചേട്ടനും, ഗീതാനന്ദന് മാഷിനും ലഭിച്ച ഭാഗ്യം. ‘ഈ പുഴയും കടന്നി’ ന്റെ കാലം തൊട്ടേ ഇക്കയെ പരിചയം ഉണ്ട്. ഏറ്റവും ഒടുവില് ‘ആമി’ യിലും ഒപ്പമുണ്ടായിരുന്നു. വേഷം ചെറുതാണെങ്കിലും ഷൂട്ടിങ്ങ് തീരുവോളം കുഞ്ഞുമുഹമ്മദിക്ക സെറ്റില് തന്നെ കാണും. തമാശകള് പറഞ്ഞ് എല്ലാവരെയും സന്തോഷിപ്പിക്കും. ചിലപ്പോഴൊക്കെ വീട്ടില് നിന്ന് ഭക്ഷണമുണ്ടാക്കിക്കൊണ്ടുവരും. എന്നും സ്നേഹം മാത്രം വിളമ്പിയിരുന്ന ഒരു മനുഷ്യന്. പ്രിയപ്പെട്ട ഇക്കയ്ക്ക് വിട….’
