ആരാണ് വിജയ് സേതുപതി; ഏഴ് വര്‍ഷങ്ങള്‍ക്ക് മുമ്പ് സംവിധായകന്‍ കാര്‍ത്തിക് സുബ്ബരാജ് നല്‍കിയ മറുപടി തരംഗമാകുന്നു
സാമൂഹ്യമാധ്യമങ്ങളില്‍ വൈറലാവുകയാണ് ഏഴ് വര്‍ഷങ്ങള്‍ക്കു മുമ്പുള്ള ഒരു ഫെയ്‌സ്ബുക്ക് പോസ്റ്റ്. സംവിധായകന്‍ കാര്‍ത്തിക് സുബ്ബരാജ് നടന്‍ വിജയ് സേതുപതിയെക്കുറിച്ച് പറഞ്ഞ ഒരു വാചകമാണ് ആരാധകര്‍ ഏറ്റെടുത്തിരിക്കുന്നത്. തമിഴകത്ത് മാത്രമല്ല മലയാളികള്‍ക്കിടയില്‍പോലും നിരവധി ആരാധകരുള്ള താരമാണ് വിജയ് സേതുപതി. ‘മക്കള്‍ സെല്‍വന്‍’ എന്നാണ് തമിഴകത്തെ ആരാധകര്‍ അദ്ദേഹത്തെ സ്‌നേഹത്തോടെ വിളിക്കുന്നതു പോലും.
ഏഴ് വര്‍ഷങ്ങള്‍ക്ക് മുമ്പ്, കൃത്യമായി പറഞ്ഞാല്‍ 2010 ഡിസംബര്‍ 23 ന് സംവിധായകന്‍ കാര്‍ത്തിക് സുബ്ബരാജ് ഫെയ്‌സ്ബുക്കില്‍ ഒരു പോസ്റ്റ് ഇട്ടു. ‘തേന്‍മര്‍ക്കു പരുവകാട്രു’ എന്ന സിനിമ നാളെ റിലീസ് ചെയ്യുകയാണ്. വെള്ളിത്തിരയില്‍ വിജയ് സേതുപതിയെ കാണാന്‍ സാധിക്കുന്നതില്‍ നിറഞ്ഞ സന്തോഷമുണ്ട്. വിജയ്ക്ക് എല്ലാവിധ ആശംസകളും. പ്രകടനംകൊണ്ടു തകര്‍ക്കൂ വിജയ്’ എന്നാണ് കാര്‍ത്തിക് സുബ്ബരാജ് അന്ന് ഫെയ്‌സ്ബുക്കില്‍ കുറിച്ചത്.
എന്നാല്‍ തൊട്ടുപിന്നാലെ ആ പോസ്റ്റിനെത്തേടി ഒരു കമന്റ് എത്തി. ‘ ആരാണ് വിജയ് സേതുപതി’ എന്നാണ് ഒരു പ്രേക്ഷകന്‍ കമന്റ് ചെയ്തത്. പ്രേക്ഷകന്റെ ചോദ്യത്തിന് സംവിധായകന്‍ കാര്‍ത്തിക് സുബ്ബരാജ് നല്‍കിയ മറുപടിയാണ് സാമൂഹ്യമാധമങ്ങളില്‍ തരംഗമാകുന്നത്. ‘വിജയ് സേതുപതി ആരാണെന്ന് വൈകാതെ നിങ്ങള്‍ തിരിച്ചറിയും’ എന്നാണ് കാര്‍ത്തിക് സുബ്ബരാജ് നല്‍കിയ മറുപടി.
അഭിനയമികവുകൊണ്ട് തൊട്ടതെല്ലാം പൊന്നാക്കുന്ന നടനാണ് വിജയ് സേതുപതി. വിജയ് സേതുപതി കേന്ദ്ര കഥാപാത്രമായെത്തുന്ന ചിത്രങ്ങള്‍ക്കെല്ലാം തായറ്ററുകളില്‍ നിറഞ്ഞ കൈയടിയാണ് ലഭിക്കുന്നത്. അത്രമേല്‍ ആരാധകരുമുണ്ട് വിജയ് സേതുപതിക്ക്. വര്‍ഷങ്ങള്‍ക്ക് മുമ്പ് സംവിധായകന്‍ കാര്‍ത്തിക് സുബ്ബരാജ് പറഞ്ഞ മറുപടി ശരിയാണെന്ന് തെളിയിക്കുന്ന തരത്തിലാണ് വെള്ളിത്തിരയില്‍ വിജയ് സേതുപതിയുടെ പ്രകടനവും.
