പോലീസുകാരനായി ടൊവിനോ; ‘കൽക്കി’യുടെ ലൊക്കേഷൻ ചിത്രങ്ങൾ കാണാം..
മലയാളത്തിൽ ഏറ്റവും തിരക്കുള്ള നടന്മാരിൽ ഒരാളായി മാറിയിരിക്കുകയാണ് യുവതാരം ടോവിനോ തോമസ്. യാതൊരു സിനിമ ബാക്ക് ഗ്രൗണ്ടും ഇല്ലാതെ സിനിമയിൽ എത്തി മലയാളി പ്രേക്ഷകരുടെ ഹൃദത്തിൽ ഇടം നേടിയ കലാകാരനാണ് ടൊവിനോ. അഭിനയത്തിലെ മികവ് കൊണ്ട് മാത്രമല്ല ഹൃദയത്തിന്റെ നന്മ കൊണ്ടും കൂടിയാണ് താരം മലയാളികൾക്ക് പ്രിയപ്പെട്ടവനാകുന്നത്.
നവാഗതനായ പ്രവീൺ പ്രഭാരം സംവിധാനം നിർവഹിക്കുന്ന ടോവിനോയുടെ ഏറ്റവും പുതിയ ചിത്രമാണ് കൽക്കി. ചിത്രത്തിന്റെ വിശേഷങ്ങളാണ് ഇപ്പോൾ സമൂഹ മാധ്യമങ്ങളിൽ വൈറലാകുന്നത്. പൂജ കഴിഞ്ഞ ചിത്രത്തിന്റെ ചിത്രീകരണം ആരംഭിച്ചു. ചിത്രത്തിന്റെ പൂജയുടെ ചിത്രങ്ങളാണ് ഇപ്പോൾ സമൂഹ മാധ്യമങ്ങളിൽ വൈറലാകുന്നത്.
പ്രവീൺ പ്രഭാരവും സജിൻ സുജാതനും ചേർന്ന് തിരക്കഥ ഒരുക്കിയിരിക്കുന്ന ചിത്രം നിർമ്മിച്ചിരിക്കുന്നത് ലിറ്റിൽ ബിഗ് ഫിലിംസിന്റെ ബാനറിൽ സുവിൻ കെ വർക്കിയും പ്രശോഭ് കൃഷ്ണയും ചേർന്നാണ്. അതേസമയം ചിത്രത്തിന്റെ പോസ്റ്റർ പുറത്തിറങ്ങിയതു മുതൽ ഏറെ ആകാംക്ഷയോടെയാണ് ആരാധകർ കാത്തിരിക്കുന്നത്.
ചിത്രത്തിൽ പോലീസുകാരനായാണ് ടോവിനോ എത്തുന്നത്. പൃഥ്വിരാജ് നായകനായുള്ള ‘എസ്ര’ എന്ന ചിത്രത്തിൽ ടോവിനോ പോലീസുകാരന്റെ വേഷമണിഞ്ഞിരുന്നു. എന്നാൽ ടോവിനോ പ്രധാന കഥാപാത്രമായി എത്തുന്ന ചിത്രം വൻ വിജയമാകുമെന്നുള്ള പ്രതീക്ഷയിലാണ് അണിയറ പ്രവർത്തകർ.
അതേസമയം കൽക്കിയുടെ പ്രമേയം ഒരു പൊലീസ് ഉദ്യോഗസ്ഥന്‍ നടത്തുന്ന കേസന്വേഷണമല്ലയെന്നും ടൊവീനോയുടെ കഥാപാത്രം ഇന്‍സ്‌പെക്ടര്‍ ബല്‍റാമിലെ മമ്മൂട്ടി കഥാപാത്രത്തിന് സമാനമായിരിക്കുമെന്നും ചിത്രത്തിന്റെ നിര്‍മ്മാതാക്കളില്‍ ഒരാളായ പ്രശോഭ് കൃഷ്ണ നേരത്തെ അഭിപ്രായപ്പെട്ടിരുന്നു.
‘ഒരുപാട് ആരാധകരുള്ള ഇന്‍സ്‌പെക്ടര്‍ ബല്‍റാമിലെ മമ്മൂട്ടി കഥാപാത്രവുമായി സാമ്യമുള്ളതാണ് കല്‍ക്കിയിലെ ടൊവീനോ. ചിത്രത്തില്‍ ഉടനീളം പൊലീസ് വേഷത്തില്‍ തന്നെയാവും ടൊവീനോ പ്രത്യക്ഷപ്പെടുക. എന്നാല്‍ കേസന്വേഷണമല്ല ചിത്രം. മറിച്ച് ഒരു സ്ഥലത്ത് സംഭവിക്കുന്ന ചില സംഭവങ്ങളാണ് സിനിമയില്‍ കടന്നുവരുന്നത്.’ വിഷ്ണുവിന്റെ അവസാന അവതാരമായ കല്‍ക്കിയുടെ പേര് സിനിമയ്ക്ക് നല്‍കിയതിനെക്കുറിച്ചും പ്രശോഭ് പറയുന്നു. ‘വിനാശത്തിന്റെ മുന്നോടിയായി എത്തുന്നയാളാണ് പുരാണത്തിലെ കല്‍ക്കി. ടൊവീനോയുടെ കഥാപാത്രവുമായി ഈ സങ്കല്‍പത്തിന് ചില സാമ്യങ്ങളുണ്ട്’ പ്രശോഭ് പറഞ്ഞു.
